Эре ончылно лияш тыршен
Тиде кечылаште Республикысе историй да археологий тоштерыште Олег Даниловлан пӧлеклалтше «Языческие культы древнего населения Марийского Поволжья» лӱман ончер почылтын.
Олег Викторович, ила ыле гын, тений 14 ноябрьыште 70 ияш лӱмгечыжым палемда ыле.
Олег Данилов Волжский район Мамасево ялыште шочын-кушкын, вара Марий кугыжаныш университетын историй да филологий факультетшым йошкар диплом дене тунемын пытарен.
Мо оҥайже, Олег Викторовичын дипломжын номерже икымше лийын. Очыни, санденак шанче пашаштыжат эре ончылно лияш тыршен. Тудо марий калыкын духовный тӱвыражым шымлен. Кандидатлык диссертацийыштыже, шанче статьялаштыже археологий экспедицийлаште погымо этнографий материалым кучылтын.
Шукерте огыл чумырымо выставкыште диссертацийлан погымо материалже-влакымат ужаш лиеш. Ончер кок ужашан. Иктыште тудын шымлымашыж дене кылдалтше паша-влакым, весыште тунемме жапысе, паша годым ыштыме, еш фото-влакым погымо.
Ончерыште марий калыкын тамгажым, палыжым пӱчкеден лукмо ӱзгарыште, вургемыште, аралтышлаште ончыктымо, мутлан, маскам, шордым, имньым, кайыкым. Выставкым шергалын лекмеке, марий калыкын ожнысо илышыжым, могай юмылан ӱшанымыжым, мом кочмыжым, могай вургемым, сылнештарышым чийымыжым, могай аралтыш дене пайдаланымыжым раш ужаш лиеш.
Олег Даниловын ӱмыржӧ кӱчык лийын гынат, шуко ыштен шуктен, марий историйыште келге кышам коден. Ончерысе экспонат-влакым шымлымеке, тудын пашажым, тунемшыже-влакым йӧратымыжым, поро айдеме, шотан ача, мунло улмыжым вигак умылет. А пашаже-шамыч самырык шанчызе-влаклан кугу шӱкалтышым, полышым пуэныт.
Михаил СКОБЕЛЕВ,
Лидия ШАБДАРОВА
М.Скобелевын фотожо
