Энергетике
Энергийым ситарат, полышым пуат
Советский посёлкышто Республик ЭнергоФРОНТын паша совещанийже эртен. Тушто Марий Эл правительстве председательын алмаштышыже С.Воронцов, Советский муниципал район администрацийын вуйлатышыже А.Трудинов, Советский районышто калыкым социально обслуживатлыше рӱдер директорын пашажым шуктышо Г.Хасанова, «Рӱдӧ да Юл кундем Россеть» генеральный директорын алмаштышыже – «Мариэнерго» филиалын директоржо С.Хлусов, филиалын ешартыш услуго ден сервисым вияҥдыме, клиент-влак дене кылым кучымо департаментшын начальникше Т.Деникина да самырык-влак советшын председательже Д.Ильин лийыныт.
Каҥашыме годым СВО-што участвоватлыше-влакын тӱнен илыше ешыштлан кӱлеш полышым энергетик-влакын вийышт дене пуымо шотышто кутырен келшыме. Филиалын Советский РЭС-шын пашаеҥже-шамыч боец-влакын Шнаран ден Вечын селаласе, тыгак Чевернур ден Яҥгранур ялласе аваштлан полшеныт.
«Землякна-влаклан да нунын ешыштлан полыш кӱлмым умылен, ме ӧрдыжеш кодын огына керт. «Мариэнерго» филиалын энергетикше-влак палемдыме задачым шукташ пижыныт. Республикысе тӱҥ энергокомпанийна социальнын виктаралтшылан шотлалтеш – регионышто илыше-влаклан энергийым ӱшанлын ситарыме веле огыл, тыгак кредалмаште улшо рвезе-влакын ешыштлан полшымо йодышымат решатла», – каласен «Мариэнерго» филиалын директоржо Сергей Хлусов.
Юрий ИСАКОВ
