Журналист-влак коклаште Россий кӱкшытышто эртаралтше «ПРО Образование-2024» конкурсышто «Марий Эл» ГТРК-ан шеф-редакторжо Наталья Ямаева сеҥыше-влак радамыш лектын.
Тудо «Эн сай телевизионный але радио проект (материал)» номинацийыште тудым кокымшо вер дене палемденыт. Конкурсын жюриже журналистын да «Марий Эл» ГТРК-ан командыжын Йошкар-Оласе 2-шо №-ан школын выпускникше Алексей Нужныйлан пӧлеклалтше фильмжым кӱкшын аклен.
Тыгак тений ноябрь кыдалне МЭТР телеканалын редакторжо Мария Шавкуновалан Москваште кӱкшӧ наградым кучыктеныт. Тудын да телеканалысе творческий группын ямдылыме «Юрьевич» документальный фильмже спорт журналистике дене Россий кӱкшытан «Энергия побед» фестиваль-конкурсын «Регионысо СМИ-влак коклаште эн сай телевизионный фильмлан Юрий Рязанов лӱмеш премий» номинацийыште кокымшо вер дене палемдалтын.
Уста журналист-влакым уло кумылын саламлена!
Г.Кожевникова
Фотом Марий Эл Образований да науко министерствын сайтше, МЭТР телеканалын соцкылысе лаштыкше гыч налме
