НОВОСТИ Сеҥымаш СПОРТ

Эн тура да мастар лийыныт

Эн тура да мастар лийыныт
Санкт-Петербургышто карабин гыч практический лӱйылтмаш дене эртыше Российын чемпионатыштыже Марий Элын командыже икымше лийын.
Чемпионат 10-15 августышто эртен. Ты таҥасымашке элнан 26 субъектше гыч участник-шамыч чумыргеныт. Спорт тирыште мастарлыкым да туралыкым ончыктышаш верч ӱдыр-рвезе-влак ик ий ямдылалтыныт, вет тыгай чемпионат идалыклан ик гана веле эртаралтеш. Шкешотан мишеньже-влак дене «Бликс» стрелковый комплексыште шукыштым куандарен. Таҥасымашлан оҥай упражненийла, чевер кеҥеж игече весела кумылым пуртеныт.
Икмыняр кече таҥасымаште Марий Элын сборныйжо икымше верыш лектын. Командын чапшым спорт мастер-шамыч Арсений Денисов, Антон Андреев, Евгения Калинина, тӱнямбал кӱкшытан спорт мастер Александр Шутов араленыт. Мутлан, «КС-1 карабин стандартный» упражненийыште эн сай результатым А.Денисов ончыктен. А мужыр дене (дуэль) лӱйылтмаште республикна гыч А.Шутов ден А.Денисов ший призёр лийыныт.
Россий ДОСААФ-ын Марий Элысе региональный пєлкажын палемдымыж почеш, сборный командым тренер, практический лӱйылтмаш дене федерацийын председательже Сергей Шутов ямдылен.
Е.Эшкинина.

Опубликовать в Одноклассники

Добавить комментарий