8 декабрьыште Йошкар-Оласе «Юбилейный» спорт комплексыште Российын Геройжо М.Евтюхиным шарныме лӱмеш комплексный единоборство дене межрегиональный турнирыште 12 команде таҥасен. Нунын кокла гыч куд сборныйжо пошкудо Татарстан гыч лийын.
Участник-влакым саламлаш Марий Эл правительстве председательын алмаштышыже С.Воронцов, молодёжный политике, спорт да туризм министр Л.Батюкова, 6-шо ротым шарныме фондын директоржо И.Евтюхин (Марк Евтюхинын шочмо шольыжо), Марий Элыште десантник-влакын ушемыштым вуйлатыше М.Фаткуллин да молат толыныт.
Комплексный единоборство – боксын, кикбоксингын, вольный кучедалмашын, самбон техникыжым да тактикыжым шотыш налын, шкешотан кучедалмаш. Сандене тыгай сынан таҥасымаште кучедалаш да бокс дене кылдалтше видла дене кылым кучышо-влак вий-куатыштым терген кертыт.
Ты гана 205 спортсмен тӱрлӧ тӱшкам да ийготым шотыш налын, 66 комплект награде верч таҥасен. Турнир сайын эртен.
– Тыгай кӱкшытан да тыгай сынан таҥасымашым икымше гана эртаренна. Куандара: кумылан спортсмен-влак ятырынак погыненыт. Ӱдырамаш-влак коклаште Кристина Васильева ден Татьяна Немцевам палемдыман. Пӧръеҥ-шамыч коклаште эн техничный семын Руслан Майков (70 кг. марте) ойыртемалтын, икымше верым налын. Тыгак шке тӱшкаштыже Алексей Гаврилов (10-11 ий, 42 кг. марте) ончыко лектын. Ончыкшым тиде таҥасымашым йӱлаш пурташ да всероссийский кӱкшытаным ышташ шонымаш уло, – манеш боевой искусство всестилевый федерацийын президентше А.Шабердин. – Адакшым рвезе-влаклан яра жапым пайдалын эртараш, лӱддымӧ, таза, патыр лияш – путырак сай йӧн.
Е.Эшкинина.
