СТАТЬИ

Еҥ суртысо изи школ гыч – чапланыше лицей марте

Шинчымаш корно

Еҥ суртысо изи школ гыч –

чапланыше лицей марте

Морко район Коркатово лицейлан  – 140 ий.

Школ  кажне еҥын илышыштыже кумда верым айла. Кунам тудо йочалан шке омсажым почеш,  тунамак историйже возалташ тӱҥалеш. Ялысе икымше  школ ондаксек еҥын суртышто верланен. Коркатово школлан тӱҥалтышым ты ял гычак Суворовмытын суртышт пыштен. Тудо черке приход школлан шотлалтын. Тушто ту пагытлан 41 эрге ден 4 ӱдыр тунемыныт.

1886 ий 20 октябрьыште  школ шке омсажым почын.  Таче тидлан 140 ий темеш. Жап эртыме семын тушто тунемше шукемын. Санденак 1951 ийыште у  школым пырня дене чоҥеныт, а 1987 ийыште кок пачашаным кермыч дене нӧлтеныт, изиш  варарак тӱҥалтыш классла ден йочасадлан посна зданий кушкын шогалын.

Школ илыш воранен шогымаште директор-влакын надырышт кугу. Кажне вуйлатыше шкешотан кышам коден.

Мылам Александр Аркадьевич  Васильев дене пырля пашам ышташ пиал шыргыжалын. 1977 ийыште тудо школ вуйлатышылан толын.

Илыш пӧрдемыште шолын, шкенжым чаманыде, пашам ыштен. Самырык тукымым куштымашке уло вийжым пыштен. Туныктышо-влаклан эҥертен, нунын деч пеҥгыдын йодмыжо, илышым у семын да 10-15 ийлан ончык ужын моштымыжо – чылажат у  кӱкшытыш шуаш полшен. 1994 ийыште кыдалаш школ лицей статусым налын. Туныктымаште  да тунеммаште сеҥымаш почеш сеҥымаш, олимпиадылаште да тӱрлӧ конкурсышто сеҥыше радам  ешаралтмаш – чылажат школ-лицейын чапшым нӧлтен.

Александр Аркадьевич кызыт сулен налме канышыште. Туге гынат лицей верч чонжо вургыж йӱла, тудын чапше умбакыжат волгалтше манын тырша.

Лицейыште тӱрлӧ профилян класслам почмаш пашам эшеат вияҥден колтен.Таче икшыве-влак кум направлений дене келге шинчымашым налын кертыт. Биологий ден химий класслаште ончыклык врач ден  лаборант,   химик ден  биолог-влакым ямдылат.  Физике ден математике класслаште ончыкылык  айтишник, инженер да архитектор-влакым куштат. Военный лийнет гын, кадет классым ойырен налаш келшен толеш. Тыге офицер, юрист, прокуратур пашаеҥ лияш корно почылтеш. Кажне направлений шкешотан, тунемаш гына ит ӧркане да ЕГЭ-м сайын сдатле.Тунам элысе кеч-могай вузыш тунемаш пурен кертат.

2026 ийыште 11 выпускник  ЕГЭ дене  90 утла  баллым поген. Алина Рыбакова  химий дене 99 баллым  налын,  Зарина Иванова – 96 баллым физике дене.

Туныктышо-влак уста улыт, шке предметыштым келгын палыме дене ойыртемалтыт.Тыгай радамыште Валентина Михайловна Васильевам, Раисия Александровна Новиковам, Виталий Николаевич Анисимовым, Нина Васильевна Ямбулатовам да молымат ончыкташ лиеш. Таче школышто 46 туныктышо тыршен ышта.

А тунемшына-влакше 336 наре улыт. Лицейыш Марий Элысе тӱрлӧ район гыч шинчымашым погаш толыт. Икшыве-влаклан тунемаш, туныктышо-влаклан пашам ышташ чыла условий уло. Школым шӧртньӧ да ший медаль дене тунем пытарыше-влакын чотышт ий гыч ийыш ешаралтеш.

2026 ийыште 9 классым 56 икшыве тунем пытарен гын, тушечын кудытшо – Йошкар аттестат дене, 11 классым 44 ӱдыр-рвезе тунем лектын гын, тушечын лужо I степенян да шымытше II степенян «За особые успехи» медальым налыныт.

Тунемме да туныктымо пашам  тӱрлӧ кӱкшытан олимпиадыште сеҥыме дене аклат. Лицейын историйжым шергал лекташ гын,  пытартыш 5 ийыште сӱрет тыгай: биологий дене – 17 сеҥыше (туныктышо Валентина Михайловна Васильева) , экологий  дене – 12  (Светлана Юрьевна Егорова), руш литератур дене – 3 (Эльвира Геннадиевна Васильева ден Людмила Викентьевна Григорьева),  физкультур дене – 3 (Елизавета Александровна Некрасова),  тыгак химий, географий, право, шочмо марий йылме предметла дене сеҥыше-влак эреак улыт.

Александр Аркадьевичын тӱҥал кодымо пашажым кызыт тиде лицейынак выпускникше Александр Васильевич Анисимов шуя. Самырык директор вуйлатыме пашам палыше, йоча-влаклан информатике предметым туныкта.

Лицей илыш икшырымын йорта. Тачысе кечын икшыве-влак, тунемме дене пырля тӱрлӧ проектым возен, Россий кӱкшытан «Орлята России», «Икымше-влакын толкынышт», «Юнармий», «Волонтер-влак» толкынлашке ушнен кертыт. Тылеч посна, тӱрлӧ предмет дене  олимпиадылаште келге шинчымашым ончыктен, Сочи олаште верланыше «Сириус» але Марий Элысе  «Волгенче» тунемме рӱдерлаште тунемаш корно почылтеш.

Лӱмгечет дене,  Коркатово лицейна! Тек тунемшет-влак шукемын толыт, а лицей омсам ончыкыжо самырык туныктышо-влак почын пурат.

Нина АРКАДЬЕВА,

Коркатово лицейыште марий йылме ден литературым туныктышо.

 

Сеҥымаш ошкыл

Коркатово лицей туныктымашке инноваций программым шыҥдарыме дене Россий кӱкшытан конкурсышто кок гана сеҥышыш лектын. Кугу Отечественный сарыште калыкнан подвигше нерген историй шарнымашым аралыме шотышто конкурсышто ялысе школ-влак кокла гыч сеҥыше семын палемдалтын.

Лицейысе военно-патриотический тоштер 2023 ийыште школысо тоштер-влакын Россий конкурсыштышт лауреат лийын. Тудын пашажым кужу жап туныктышо да ОБЗР дене организатор Валерий Александрович Подбойкин виктарен шога.

Социальный тӱҥалтыш сферыштат кугу ошкылым ыштыме – Марий Элын калык туныктышыжо Валентина Николаевна Васильеван моштен вуйлатымыж почеш «Порылык каникулыш ок кай» конкурсышто сеҥеныт, Росмолодёжьын грантшым налыныт, Тимченко фондын «У кычалше-влак» конкурсыштыжо ойыртемалтыныт.

2026 ийыште директорын воспитаний шотышто советникше Надежда Георгиевна Андрееван тыршымыж дене Икымше-влакын толкыныштын Россий конкурсыштышт самырык-влакын проектыштым илышыш пурташ грантым налыныт.

Лаштыкым Юрий Исаков ямдылен.

Снимкыште: Коркатово лицейын туныктышо ешыже.

Фотом Коркатово лицей деч налме.

Добавить комментарий