21 мартыште «Солнышко» йоча интернат-пӧрт 50 ияш лӱмгечыжым палемден
«50 ияш юбилей – тиде сылне пайрем веле огыл, эше эртыше жапыш савырнен ончалаш, ала-могай иктешлымашым ышташ, сеҥымаш-влакым шарналташ, ончыкылык паша нерген шоналташ амал. Йоча пӧрт – тиде социальный тӧнеж веле огыл, а эн ончычак – кугу да икоян еш дене илыме шокшо вер. Сай йочам ончен куштымо эн сай йӧн – тиде тудым пиаланым ышташ. Икоян коллективын тыршымыж дене йоча-влак илышлан куанаш, икте-весе дене келшаш, кугуракым пагалаш, изираклан полшаш тунемыт. Нуно кумда илыш корныш лекташ ямдылалтыт. Тыште ӱдыр-рвезе-шамычым шке семын илаш, обществын тичмаш праван еҥже лияш туныктат», – лӱмгече шот дене погынышо-влакым саламлен манын регионын паша да социальный аралымаш министрже Марина Островская.
Интернат-пӧртым шочмо кечыж дене тыгак кугыжаныш орган, социальный аралымаш ден шинчымашым пуымо тӧнеж, мер организаций, Йошкар-Оласе предприятий-влакын еҥышт саламленыт. Нуно чыланат интернат-пӧртын коллективше да воспитанникше-шамыч дене шукертсек келшат, йоча-влакым йол ӱмбаке шогалтыме пашашке надырыштым пыштат.
Поро шӱм-чонан еҥ-влак лӱмеш тауштымо шуко мут йоҥгалтын.
М.ИВАНОВА
Снимкыште: пайрем кечын тӱшка фото
Марий Эл Паша да социальный аралымаш министерствын фотожо
