Элнам аралыше-влаклан чап лийже!
«Мемнан ешна – мемнан Сеҥымашна» проект дене келшышын, «Защитники Отечества» кугыжаныш фондын Марий Элысе филиалже «Отечествым аралыше-влакын ешышт» акцийым эртара.
Тыге геройна-влакын ешышт дене палыме лийына.
Мыняр жап шарнаш тӱҥалына, тунар Геройна-влак «илат», маныт.
Эртыше кечылаште Йошкар-Оласе 14-ше №-ан гимназийыште торжественный линейкыште тунемше-шамычым Кугу Отечественный сарын ветеранже Александр Курланов ден Марий Элын сулло артистше Татьяна Денисова саламленыт.
Вооруженный Вийын ветеранже, РФ науко да техникын сулло пашаеҥже, СССР кугыжаныш премийын лауреатше, технике науко доктор, кум академий наукын Академикше, генерал-майор Александр Дмитриевич кадет ден юнармеец-шамычлан тунемаш, шинчымашым налаш, спорт дене кылым кучаш кумылаҥден ойлен.
Татьяна Яковлевна – 14-ше №-ан гимназийыште тунемше выпускникын, специальный военный операцийыште геройла вуйым пыштыше Иван Денисовын аваже. Марий калыкын пагалыме да йӧратыме мурызыжо «Стелла» пионер дружинын знаменный группыжым, барабанщикым, горнистым тургыжланен ончен.
Торжественный мероприятий деч вара кабинетыште кугурак-классыште тунемше-шамыч дене вашлиймаш эртен. Уна-влаклан кадет Валерия Сергеева шке возымо почеламутшым лудын, а Тимур Фёдоров Иван Денисовын илышыже да подвигше нерген проект пашаж дене марла палдарен. Татьяна Яковлевна гимназийын геройжо-влаклан келыштарыме пырдыж воктене, шинчавӱд йӧре шоген, вет тушто тудын эргыж нергенат возымо.
Иван Денисов специальный военный операцийышке контракт почеш каен. Боевой заданийым шуктымыж годым сӧй пасуэш вуйжым пыштен. Колымыж деч вара «Мужество» орден дене палемдалтын. Марий патриотын пелашыже, кок икшывыже тулыкеш кодыныт. Жапше годым Ваня Марий Элыште шорт-трек дене тренироватлалтын, регионнан чапшым арален. Варажым Москва кундемыште, спорт школышто тунемын, ты вид дене кыртмен заниматлалтын, Российын спорт мастерже нормативым шуктен. Ик жап шорт-трек дене тренерланат пашам ыштен.
Гимназийыште тунемше-шамыч уна-влакын каласкалымыштым тӱткын колыштыныт, тургыжландарыше йодышым пуэденыт, мучашлан чылан пырля шарнаш кодшын войзалтыныт.
Ӱдыр-рвезе-влак пайдале вашлиймашлан тауштеныт, уна-влаклан пеҥгыде тазалыкым, тыныс кавам тыланеныт.
Элнан Геройжо-шамычлан чап лийже!
Елена Эшкинина
