Йошкар-Оласе Тумер микрорайонысо Серафим Саровский лӱмеш храмыште кызыт СВО-што улшо салтак-влак верч кумалме шӱдымшӧ молебен эртен.
Храмже Йошкар-Оласе военный гарнизонынлан шотлалтеш. Санденжат тыгай кумалтыш йӱлаш пурен. Тыгак СВО участник-влак дене пырля утарен кодымо у кумдыклаште тыныс илышым тӱзаташ полшышо доброволец-влак верчынат кумалыт. Молебеным храмын протоиерейже Александр Бачурин клирик-влакын полшымышт дене эртарен. Каласен кодыман, тыгай кумалтыш тыште 2022 ий шыже гычак лиеда. Кажне вӱргечын 18 шагатат 30 минутышто тӱҥалеш.
А рушарнян туштак Марий митрополит Иоанн, Корей епископ Феофан литургийым эртареныт. Корей епископшо мыланна тора мланде гыч благословенийым конден. Шке жапыштыже, ХХ курым тӱҥалтыште, тушто землякна архимандрит Аверкий (Бойков) миссионер семын ыштен. Тудым варажым Семёновкысо селасе Юмым шочыктышо пресвятой аван шочмыжлан черке воктеке тоеныт.
Шарнымашеш кодаш митрополит уналан панагийым, тыгак Йошкар-Ола да Марий епархийын кумло ияш лӱмгечыжлан ыштыме сувенир сатум кучыктен.
Светлана Носова
Снимкылаште: молебен годым.
Фотом Марий митрополийын лаштыкше гыч налме.
