Школлаште – 2023-2024 тунемме идалыкын пытартыш чырыкше, ончылно адакат выпускник-влакым Иктешлыше кугыжаныш экзамен вуча. Тений шинчымашым тергыме «тургым» 23 май гыч 1 июль марте эрта.
Тиде кечылаште Россий Просвещений министерстве ден Рособрнадзор ЕГЭ-н расписанийжым уэмден луктыныт. Экзамен-влак тыгай кечылаште эртат:
23 май – географий, литератур и химий;
28 май – руш йылме;
31 май — математике (базовый да профилян);
4 июнь – обществознаний да физике;
7, 8 июнь – информатике дене ик жапыште йот йылме дене ЕГЭ-н устный ужашыже;
11 июнь – биологий, историй да йот йылме дене письменный ужаш.
Документыште палемдыме: выпускник ик предмет дене экзаменым приёмный кампаний мучаш марте уэш кучен кертеш:
4 июльышто – информатике, обществознаний, руш йылме, физике, химий, йот йылме (письменный ужаш);
5 июльышто – биологий, географий, математике (базовый да профилян), историй, литератур да йот йылме (устный ужаш).
Тений февральыште Россий Федераций президент Владимир Путин Федеральный погынлан посланийыштыже абитуриент-влаклан Иктешлыше кугыжаныш экзаменыш пуртымо ик предметшым уэш кучаш йӧным ышташ темлен.
Март тӱҥалтыште Рособрнадзорышто увертареныт: тыгай йӧн вузыш тунемаш пураш шонышо-влаклан пуалтеш. Март мучаште Владимир Путин у правилым пеҥыдемден.
Апрель тӱҥалтыште Рособрнадзорым вуйлатыше Анзор Музаев увертарен: Иктешлыше кугыжаныш экзаменым уэш кучаш кок кече ойыралтеш.
Г.Кожевникова