Таче Марий Элысе общеобразовательный организацийлаште экзамен кампанийын тӱҥ йыжыҥже тӱҥалын.
Икымше экзамен 9-ше классым тунем пытарыше-влаклан лийын: англичан йылме дене шинчымашым тений 400 утла ӱдыр-рвезе терген.
Таче 9-ше классым тунем пытарыше 358 еҥым шочмо йылме дене экзаменыш регистрироватлыме. Тышеч олыкмарий йылме дене тергымашым 259 тунемше эртышаш, курыкмарий йылме дене – 79, татар йылме дене 20. Шочмо йылме дене экзамен паша кок ужашан лиеш: изложений да изложенийын текстше почеш усталык паша. Заданийым шукташ 180 минут пуалтеш. Тений тиде экзаменлан лӱмынак икмыняр изложений текстын аудиоверсийжым ямдылыме. Нуным марий да татар йылмылам туныктышо-влак йӱкаҥденыт.
Палашлан: тений 9-ше классым пытарыше-влак кокла гыч эн шукынжо (55 процент) географий дене экзаменым ойыреныт, обществознанийым – 40 процент, информатикым – 38 процент.
Фотом Марий Эл Образований да науко министерствын соцкылысе лаштыкше гыч налме
