Марий Элым вуйлатыше Александр Евстифеев республиканский социальный выплате-влакым 25 процентлан индексироватлен.
Вашталтыш пашан ветеранже, тылын труженикше, реабилитироватлыме еҥ, кок але тылеч шукырак инвалид йочам ончышо пашам ыштыдыме ача-ава-шамыч дене кылдалтын. Тылеч посна реабилитироватлыме еҥ ден тылын труженикше-влакын топливылан ыштыме роскотыштлан тылзе еда тӱлыман окса компенсаций ден медикаментым налаш тылзе еда тӱлыман окса выплатым, шуко шочшан еш-шамычлан топливым налаш да школышто кочкаш ик гана тӱлыман окса компенсацийым индексироватлен.
Калык илышым саемдыме шотышто министр Марина Островскаян мутшо почеш, таче республикыштына 2013 ий гычак индексироватлыде кодымо социальный полыш мере-влак улыт. Тиде йодышым регионым вуйлатыше шке контрольышкыжо налын, да кӱштымыж почеш социальный выплате-влакым индексироватлаш лийме йӧн-шамычым онченыт.
«Эн ончычак пашан ветеранже, тылын труженикше, реабилитироватлыме еҥ-влакын тылзе еда тӱлыман окса выплатыштым индексироватлаш темлена. 1 январьлан налмаште республикыштына тыгайлан шотлалтше 42138 еҥ ила. Вара рӱдӧ отопленийдыме пӧртлаште илыше пашан ветеранже ден реабилитироватлыме еҥ-влаклан илыме верым ырыкташ да медикаментым налаш тылзе еда ойырымо окса выплатым кугемдаш кӱлеш ыле. Тыгай-шамыч радамыште 4968 еҥ шотлалтеш. Кок але тылеч шуко инвалид йочам ончышо пашам ыштыдыме ача-ава-шамычлан тылзе еда тӱлымӧ окса выплатымат 2015 ий гычак компенсироватлыме огыл, шуко шочшан еш-влаклан топливым налаш да школышто кочкаш ик гана тӱлыман окса компенсаций ден кугыжаныш награде-влак дене палемдалтше еҥ-шамычын транспортыштым обслуживатлаш ик гана тӱлыман окса выплатым – 2013 ий гыч. Пытартыш тӱшкаште 7668 еҥ шотлалтеш», – рашемден М.Островская.
Республикын финанс министрже Алексей Торощинын палемдымыж гыч, нине выплатым эртыше ийын налме ешартыш доход кӱшеш индексироватлат.
Правительстве председательын алмаштышыже Ольга Федорова коллегыже-влакын темлымышт дене тӱрыснек келшен да тиде ошкылым сайлан шотлен.
А.Евстифеев тарватыме йодышым Кугыжаныш Погын депутат-влак дене пырля мучаш марте ончаш да граждан-влаклан палемдалтше социальный выплате-шамычым 1 февраль гыч индексироватлаш кӱлмым палемден.
«Социальный выплате-влакым 25 процентлан индексироватлаш республикын бюджетше 112,3 миллион теҥгем ойырышаш, да тиде пунчалым ме луктына», – рашемден А.Евстифеев.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
