Марий Элыште уэмдыме Эндокринологический рӱдерым почыныт.
Республикысе клинический больницыште капитально олмыктымо деч вара почмо Эндокринологический рӱдерыш Марий Эл правительстве председательын икымше алмаштышыже Наталья Ошланова миен.
«Марий Элым вуйлатыше Юрий Зайцевын палемдымыж почеш, медицине пашаеҥ-влакын кыртмен тыршымышт, федерал рӱдерын полшымыжо да «Здравоохранение» национальный проектым илышыш пуртымо дене 2024 ийым сай лектыш дене иктешлыме. Ме тӱҥалме шырымнам умбакыже шуена. Да тачысе событий – тиде «Кужу да чолга илыш» национальный проектын ик ужашыжлан шотлалтше «Сакыр диабет ваштареш кучедалмаш» федерал проектшым илышыш пуртымо корнышто пеҥгыде ошкыл», – манын Наталья Ошланова.
Республикысе клинический больницын помещенийлажым капитально олмыктымо да тушко эндокринологический службын у кумдыкшо-влакым кусарыме нерген пунчалым эндокринный черан пациент-шамычлан эмлалтме йӧным саемдыме шонымаш дене лукмо. Пашалан регионын бюджетше гыч 2024 да 2025 ийлаште 23 миллион наре теҥгем ойырымо, ты суммо гыч 3 миллион теҥгежым медицине оборудований ден мебельлан кучылтмо.
Таче Эндокринологический рӱдерын тӱҥ задачыже – сакыр диабетлан кӧра орланыше пациент-влаклан медицине полышым пуымо качествым саемдаш, тазалыклан эшеат кугу зияным ыштыме деч вӱргорно гипертоний, кугу холестерин, уто нелыт, кояҥмаш гай чер-влакын вияҥмышт деч аралыме да эмлыме пашам шукташ.
Рӱдерым у кумдыклашке кусарыме дене медперсоналын пашажым да пациент-влакым эмлыме йӧным палынак саемдыме. Сутка мучко пашам ыштыше стационарыш 35 койкым шындыме, кечывал стационарыш – нылытым. Тыгак ик да кок еҥлан палемдалтше утларак йӧнан палате-влакым келыштарыме. Сакыр диабет школ ден Диабетический йолгопа кабинетлан занятий-влакым эртараш посна кумдыклам ойырымо. Кочмыверат уло. Начарын коштшо пациент-влаклан шуко сай йӧным ыштыме.
Медицине услугым кок врач ден кок медсестра ыштат.
Марий Элым вуйлатышын пресс-службыжын уверже негызеш Маргарита Иванова ямдылен.
