Морко район Чодыраялыште лиймына годым шинчашкына Тихомировмытын суртышт логале. Нунын оралтышт молын деч ойыртемалтше. Тӱжвачын пӧртым оҥам ушештарыше калай сайдинг дене комыжлымо, садлан умбачын пу пӧрт гай коеш.
Суртоза ден озавате мыланна чыла радамын каласкалышт, кажне пӧрт лукым ончыктен коштыктышт, манаш лиеш. Вате-марий коктынат кевытыште пашам ыштат. Айна Ивановна тиде ялыштак шочын-кушкын гын, Александр Юрьевич – Рушродо ял гыч. Мужыр пелаш 14 ий пырля илат. Эргыштлан тений 13 ий темеш. Айна Ивановнан эше кум шочшыжо уло.
Тихомировмыт суртыштым лу ий ончыч чоҥаш тӱҥалыныт. Пӧртын проектшым тичмашек Айна Ивановна шонен луктын.
Шке жапыштыже Айнан ачаже, Иван Фёдорович, уста столяр, мастар плотник лийын. Ӱдыржымат ты пашалан шӱмаҥден.
Тихомировмыт суртыштым Айна Ивановнан ача-аважын сурт олмыш шынденыт. Негызым уэмденыт, пу пӧртын пырдыжшым коденыт, икмыняр пӧлемым ешарен чоҥеныт. Пӧртын кумдыкшо 200 квадратный метрыш шуэш. Пырдыжым пено-газоблок гыч ыштеныт, ӱмбачын калай сайдинг дене комыжленыт. Кӧргыштӧ специальный оҥам – вагонкым – кучылтыныт, тудым эше пу обой маныт. Вӱдым, газым пуртеныт. Кокымшо пачашыште – малыме пӧлем, икымшыште – кугу зал ден кухньо. Монча уло гынат, суртоза эше душевой кабиным вераҥдаш шона, молан манаш гын тушто писын чывылалташ лиеш.
Пакчашт кугу огыл гынат, чыла куштат. Кандаш сотык пареҥгым шындат, кок кугу теплицышт уло. А теве вӱташт – кугу. Кызытеш тушто сӧснам, чывым ашнат. Ончыкыжым ушкалым налнешт.
Александр Юрьевич специальностьшо дене инженер-механик, Марий политехнический институтым тунемын пытарен. Вуз деч вара шочмо кундемышкыже пӧртылын. Тӱҥалтыште колхозышто паша вер лийын огыл, варажым озанлыкшат шаланен. Тыге олаш каен, заводышто механиклан пашам ыштен. Тудо пагытыште Айна дене палыме лийын.
– Мылам ялыште илаш келша. Пелашем дене кугешнем. Тудо шкетын ялыште илен, кум икшывым ончен, суртысо сомыл тудын ӱмбалне лийын. Тыгак ачаж нерген поро шарнымашым, тудын столяр ден плотник инструментше-влакым арален коден. Нуным мый ынде шке пашаштем кучылтам, – мане Александр Тихомиров.
Мыланнат нине инструмент-шамычым ончалаш оҥайын чучо. Суртоза дене пырля изирак мастерскойышкыжо кӱзышна. Чемоданыште тӱрлӧ инструмент кия: стамеске, циркуль, пужара, молат. Айна Ивановна ачажын мастерскойжымат ончыктыш. Тудыжо пӧрт воктене, кудывечыште верланен. Туштыжо кугу пужарым, окна ден омса лондемым ышташ келыштарыме специальный инструментым шекланышна. Коеш, Иван Фёдорович кугу мастар лийын, а ӱдыржӧ ден веҥыже тудын поянлыкшым сайын аралат да шке пашаштышт моштен кучылтыт.
Михаил СКОБЕЛЕВ,
Лидия ШАБДАРОВА.
Михаил Скобелевын фотожо.
