Апрельыште шуко законыш вашталтышым пуртымо. Мутлан, илыме верым илыдымыш, илыдымым илымыш савырыме шотышто ӱчашымашан татым закон дене тӧремдыме. Водительын праважым налаш экзаменым изишак куштылемдыме. Регион-влаклан сыра ден сыра шотан напиткым сутка мучко ужалыше «наливайке» манме гай верлам петыраш правам пуымо. А тамакым лицензий деч посна ужалымылан тюрьмашке вич ийлан шындаш палемдыме. Социальный пенсийым кугемдыме.
Пужен ыштыме радамым рашемдыме
У правил дене келшышын, «пужен планироватлымылан» помещенийын чекше ден кумдыкшым, кӧргӧ планировкыжым вашталтыме, у помещенийым ыштыме шотлалтеш. Тыгай шотан вашталтышым ЕГРН-ыш пуртыман, но документым илыме верын собственникше огыл, а муниципалитетын пужен ыштымым пеҥгыдемдыше комиссийже колтышаш.
Илыме помещений «илыдыме» статусым ЕГРН-ыште палемдыме деч вара налеш.
Социальный пенсий кугемын
Социальный пенсийым 7,5 процентлан (кокла шот дене 938 теҥгелан) кугемдыме, да тудо 13455 теҥге лийын.
Элыштына кугыжаныш пенсий обеспечений шотышто кугемдыме пенсий ден выплатым 4,1 миллион утла еҥ налеш.
Экзамен куштылемын, но…
ГИБДД-ште водительын праважлан экзаменым приниматлыме радам вашталтын. Штрафын баллжым визыт гыч шымыт марте кугемдымылан, рашемденрак палемдаш гын, эше кок изи але ик кокла йоҥылышым ышташ лиймылан кӧра машинам виктарыме ужаш куштылемын, но тыгодымак тушко пуртымо йодмаш пеҥгыдемын: экзаменым угыч сдатлен кертме жапым 7 кече гыч пел ий марте кужемдыме, автобус водительлан легковой але грузовой автомашинам эн шагалже ик ий виктарыме деч вара веле ямдылаш пунчалме, военкоматын повесткыж деч шылын коштшо-шамычым экзаменыш огыт пурто, нунылан водительын удостоверенийжымат огыт пу.
Писын тӱлаш йӧным ыштыме
Юрлица-шамычлан Писын тӱлымӧ системе (СБП) дене пайдаланаш йӧным ыштыме.
СБП полшымо дене банк-влак коклаште дебет карте але счёт гыч мобильный телефонын номерже дене тылзыште 100 тӱжем теҥгем комиссий деч посна кусараш лиеш.
Тачысе кечылан тиде системыш 200 утла банк ушнен.
Кредитым огыт пу
Российын банкше тӱлен кертдымыла чучшо клиент-влаклан кредитым але кредит картым кокымшо кварталыштат огеш пу.
Пурлмыверым петырашат лиеш
1 апрель гыч «пурлмывер» нерген закон вийыш пурен. Алкогольым сутка мучко ужалыше точко-влак чӱчкыдын общепитын маскыжым чиеныт. Ынде регионласе кучем-влак общепитын услугыжым ыштыме годым сыра ден сыра шотан напиткым, сидрым, мӱй пӱрым, пуарем розницыш ужалыше точко-шамычым шуко пачеран пӧртыштат, тудын кумдыкыштыжат петырен кертыт. Регион-влак тыгай алкогольым барыште, рестораныште, кафеште да буфетыште гына ужалаш разрешитлышаш улыт.
Лицензий уке – эрык уке
Никотинан средствым лицензий деч посна ямдылымылан, кондыштарымылан, налмылан, аралымылан да ужалымылан 4 миллион теҥге марте штрафым пуэн але вич ий марте эрык деч посна коден кертыт.
Мӧртньым маркироватлат
Осётр да лосось тӱшка колын мӧртньыжым маркироватлаш тӱҥалыт. Тидым шояк рынке ваштареш кучедалме шот дене ыштат. Росрыболовство шотышто федеральный агентствын аклымыж почеш, таче шояк рынке йошкар мӧртньым гына 4 миллиард утла теҥгеш ужала.
Йӱдвелыш – у правил дене
Кӱлешан сатум Российын тора кундемлашкыже у правил почеш кондыштараш тӱҥалыт. Ынде тудым централизованно виктарат, тыгодым йӱдвелне илыше 3 миллион еҥлан сатун акшым иземдаш йӧным ыштыше кугыжаныш полыш механизмым кучылтыт.
ОСАГО шотышто уверым – Кугыжаныш услуго портал гоч
Апрель гыч ОСАГО, ДСАГО, КАСКО полис-влак да граждан-влакын илыме верыштым страховатлыме шотышто уверлам Кугыжаныш услуго портал гоч налаш лиеш.
М.ИВАНОВА ямдылен
М.Иванован фотожо/ «Марий Эл» увер агентстве
