«Таза Республик» проект почеш тазалыкым аралаш да пеҥгыдемдаш Марий Элыште чыла условий ышталтеш.
1 июнь гыч Йошкар-Олаште шуко пачеран пӧрт-влак улман кудвечылаште мобильный «Тазалык пункт-влак» пашам ыштат. Тушто еҥ-влак экспресс-тергымашым эртен да вӱрыштышт глюкозо ден холестерин, кислород мыняр улмым, вӱргорно ден шинча кӧргысӧ давленийышт, кап нелытыштын индексыштым рашемден, ЭКГ-ым ыштыктен кертыт.
26 июньышто Марий Эл вуйлатыше Юрий Зайцев 1-ше №-ан Медико-санитарный частьыште лийын. Тушко кум ий жапыште тӱрлӧ оборудованийым: мультиспиральный компьютерный томографым, флюорографым, маммографым, стационарный рентгентым – конденыт.
Тыгак рентген оборудований-влакым Йошкар-Оласе 4-ше №-ан поликлиникыште, Медведево да Шернур рӱдӧ районный эмлымверлаште вераҥденыт.
Республик вуйлатышылан I да II типан сакыр диабетан пациент-влаклан ӱмаште августышто почмо школым ончыктеныт. Кызытсе жаплан тушто 292 еҥ тунем лектын.
Марий Эл вуйлатышын пресс-службыжын уверже негызеш Л.Камалетдинова ямдылен
