Шукерте огыл «Кугу Какшан» заповедник Медведево районысо Орловко ялыште тазалыкым пеҥгыдемдыме лагерьыште «Колым кучена» еш слётым эртарен.
Тушко тулык йоча рӱдерлаште илыше, тулык йочам ашнаш налше еш, тыгак «МариЯ» тулык йочам ашнаш налше-влакын ассоциацийыштын еҥже-шамыч ушненыт. Слёт спорт таҥасымаш-влак гыч тӱҥалын. Мутат уке, колым кучымо турнират эртен. Моло кок кечыжат тушко толшо-влакын кумылыштым нӧлтен. Марий аварийно-утарыше службын специалистше-влак, вӱдыштӧ туткарыш логалаш огыл манын, шкем кузе кучымо, икымше полыш дене кылдалтше шинчымашым пуэныт. Слёт эртыме кумдыкышто творческий мастерской-влак пашам ыштеныт, тӱрлӧ модыш, конкурс эртаралтыныт. Кажне кастене тулото воктене гитар почеш пырля мурен, мутланен шинчыме татат кужу жаплан шарнымашешышт кодеш.
С.НОСОВА
