Июльышто Марий Элыште кӱдыр ден ийын коштшо кайыквусын игым ыштымекышт чотышт мынярлан ешаралтым рашемдыме пашам мучашлат.
Тидым Янлык тӱня департаментын кугыжаныш инспекторжо-влак шуктат. Мутлан, шошым сузо ден кӱдырын чотыштым рашемденыт: сузыжо 3900, кӱдыржӧ 7700 лийын.
Шошым тыгак ик вер гыч весыш куснымышт годым кайыкомбын чотыштым рашемденыт. Но тений мемнан кундем гоч нуно шагалынрак чоҥештен каеныт. Нунылан келшыше кочкыш улман да вӱдан кумдыклаште кайыкомбо-влак лакемаш тыршат. Инспектор-влак утларакын чоҥештен кайымыштым У Торьял ден Волжский районлаште шекланеныт.
Светлана Носован фотожо
