Йошкар-Оласе Калыкле-прикладной сымыктыш тоштерыште «Виче мастар» ончер почылтын. Тудым Киров областьысе П.Алабин лӱмеш краеведений тоштерын фондшо гыч кондымо. Выставкыш ХIХ-ХХ курымласе экспонат-влакым чумырымо.
Ончерыште дымковский модышым, ажуран кружевам, матрёшкым, пушеҥге мыгыле гыч ыштыме арверлам ужаш лиеш. ХХ курымышто Виче кундемыште эн шуко кидмастар лийын, палдарен возымо выставкысе экспозицийыште. Верысе кидмастар-влак тукым гыч тукымыш паша секретыштым, йӱлаштым арален коденыт. Ончерыште Виче кундемын символжылан, шун гыч ыштыме да тӱрлӧ тӱс ден чиялтыме дымковский модышлан, кугу верым ойырымо. Тений тудлан 400 ий темеш. Шукыж годым ты модышым ӱдырамаш-влак ыштеныт.
А кружеваже гын выставкыште могай гына уке! Тудын рӱдыжлан Советск ола (Кукарка слобода) шотлалтеш. Легенде почеш, Петр I кугыжа годым ты олаш пушым ыштыше плотник илаш толын. А кружевам тудын голландке пелашыже пидын, тудак верысе ӱдырамаш-влакым ты кидсомыллан туныктен.
Ончерыште тыгак тӱрлӧ матрёшкым чумырымо. Пушеҥге мыгыле гыч ыштыме
шкатулко, сӧрастарыш-влакат ойыртемалтше улыт. Нуным ончен, кумыл нӧлталтеш, молан манаш гын тул гайрак тӱсышт шыжымсе йӱштӧ игечыште чоным ырыкта.
Михаил СКОБЕЛЕВ,
Лидия ШАБДАРОВА
М.Скобелевын фото ден фоторепродукцийже
