Медведево район Руэм посёлко воктенысе чодыраште каналтен коштшо, тыгак ече дене мунчалтыше-влак пушеҥге воктене верланыше тӱрлӧ оҥай фигурым, йомак гыч персонаж-влакым ужын кертыт.
Ик кечын мыят, ече дене мунчалтен эртымем годым, чумыргышо еҥ-влакым ужын, воктекышт лишемым да чылт ӧрым. Йомак-чондайыш логальымыс, калтак. Теве ик велне лум гыч ненчыме шоҥшо-влакын ешышт «саламлат». Воктеныштак коҥгаште нарынче тӱсан «Ӱяча» шыргыжеш. Эше ончыкыла ошкылат – кугу Крокодил, умшажым каралтен, пуйто толшым «нелын колташ» ямдылалтын. Тенийсе идалыклан келшыше Тиграт воктекем лишемза манын «ӱжеш», сымыстара. Мультфильм гыч Ниф-ниф, Нуф-нуф да Наф-нафат воктекышт ӱжыт.
Ты кундемыште илыше-влаклан организатор-шамыч, «Живой Руэм» сообществе, Надежда Товашова «Зимняя фантазия» конкурсым увертареныт.
Поснак йоча-шамыч, шке уш-акылыштым пудыратылын, лум гыч келшыше персонажым ненчат, тӱрлӧ чия дене келыштарен чиялтат. Тидыже каналташат, жаплан йомакла гыч персонаж-влакым шарналташат – моткоч оҥай йӧн.
Ик кумдыкыш шкешотан пайрем тӱсым пуртеныт. Оҥай, пуйто жаплан йомак тӱняш логалат: свежа ош лум дене леведалтше пӱнчер ден кожер, тӱрлӧ фигур, лумкурчак коклаште изиракшат, кугурак ийготанжат ече дене мунчалтен эртышыла, шогалын ончат, илалшыже скандинав коштмаш дене коштшыла, куанен ончат.
Теве кузе! Айдемылан шуко кӱлеш, ужат! Кумылет гына лийже, ит ӧркане. «Зимняя фантазия» конкурсыш чыла кумылан еҥ ушнен кертеш.
– Физкультур урокышто ече дене лекме годым туныктышо мыланнат темлен. Сандене мыят уло кумылын ушнем, – Чебурашкым, Пандым ненчен, сӱретлышыжла, мане Руэм кыдалаш школышто тунемше Настя. – Лишыл каныш кечылаште ты конкурсын иктешлымашыже лийшаш.
Е.Эшкинина
Авторын фотожо
