Уремыште шокшо игече шогымылан кӧра Марий Элыште чылаже 9 районышто пожар ваштареш кучедалме посна режим увертаралтын:
Юрино районышто – 9 гыч 20 июль марте;
Курыкмарий районышто – 6 гыч 25 июль марте;
Килемар районышто – 27 июнь гыч 20 июль марте;
Медведево районышто – 234 июнь гыч 21 июль марте;
Звенигово районышто – 1 гыч 17 июль марте;
Кужэҥер районышто – 8 гыч 18 июль марте;
Волжский районышто – 7 июль гыч посна кӱштымашым лукмо марте.
Эше кок районышто посна кумдыклаште гына тудо пурталтын. Мутлан, У Торъял районышто 6 июль гыч посна кӱштымашым лукмешке Масканур, Какшанмучаш, Тошто Торъял да Чӱксола ял шотан илемлаште тыгай режим увертаралтын.
Тиде жапыште теве мом ышташ чарыме:
- еҥ-влаклан, тыгак транспорт дене чодырашке пураш;
- тулотым ышташ, шӱкым, йӱлышӧ вещества ден материалым, кукшо шудым йӱлалташ, пожар лийын кертме лӱдыкшым лукшо пашам шукташ;
- тулотышто кочкаш шолташ, пожар лийын кертме илыме верлаште, сад товариществылаште, йоча-влакын каныме да тазаҥдарыме организацийлаште, чодыраште, чодыра-парк кумдыклаште, торфан участкылаште да чодыра воктене улшо верлаште пиротехникым кучылташ.
Тидын нерген республикын Пӱртӱс поянлык, экологий да йырым-йырысе средам аралыме министерствыже палдара.
Л.Камалетдинова
