2023 ийыште Марий Элыште чодыра дене пайдаланыме деч парыш 394,6 миллион теҥгеш шуын.
Тидыже тулеч ончычсо ий дене таҥастарымашыте 18,1 процентлан шукырак. Регион тыгай парышым налме дене Юл кундем федерал округышто икымше верыш лектын.
Рослесинфоргын «Поволжский леспроект» филиалжын директоржо Павел Лебедевын ойлымыж почеш, кодшо ийын федерал бюджетыш 178,5 миллион теҥгем колтымо. Кугу ужашыже субъектлан кодын. Верысе бюджет-влак 3 миллион теҥгелан пойдаралтыныт. Парышын тӱҥ ужашыже чодыра участкым пум ямдылаш арендыш пуымо ойпидыш деч пура. Тыгак полезный ископаемыйым лукташ разаботкылан, чодыра фондын мландыштыже туризм ден каныме верлан, шанче шымлыме пашалан, линейный объект-влакым эксплуатироватлаш, ир кушкылым ямдылаш да сонарлаш арендыш пуымо ойпидыш-влакат парышым кондат. Чодыралан тӱлымӧ деч посна лесопромышленный компаний-влак тӱрлӧ налогымат тӱлат.
Налме парыш чодырам уэмден толмо пашалан, чодыра озанлык ден чодыра пожар ваштареш кучедалме техникым налаш, нӧшмо шапашым ышташ, профилактик мероприятий-влакым эртараш кая.
С.Носова
