Игече йӱкшемдаш тӱҥалмеке, черле-влак утларак да утларак ешаралтыт. Теве кодшо гана поликлиникыш мийымеке, врач деке приёмыш пураш черетыште моткоч шукын улыт ыле. Тугеже шкем аралаш кӱлеш манын шоналтенам ыле, но эрлашынжак мыйынат логарем коршташ, нер йогаш, варажым кокыртышат витараш тӱҥале. Аптекыште кок тӱжем утла теҥгелан эмым налын толмеке, вигак эмлалташ пижым. Юмылан тау, писын паремым.
Йолташ-влак, черланаш огыл манын, мом ыштеда? Черланымеке, калык медицинылан але эмлан эҥертеда? Прививкым ыштыктеда мо?
Алена ТОКТАШОВА, перманент макияжым ыштыше мастер (Татарстан Республик):
– Черланаш огыл манын, витаминым йӱына, витаминлан поян фруктым, саскам утларак кочкаш тыршена. Спорт денат кылым кучена, вет тудо капкылым пеҥгыдемда да уш-акылым яндарешта.
Черланымеке, шке гыч эмлалташ ом тырше, мутат уке, эмлымверысе врачын каҥашыжлан эҥертем.
Тазалык – эн кугу поянлык, садлан шкендам аралыза, игече дене келшышын чияш тыршыза.
Ирина ЮШКИНА, самырык мурызо:
– Ешыштына прививкым иктат огына ыште. Юалгырак игече шумеке, витаминан кочкышым утларакшым кочкаш тыршена. Кылмыктыме камерыш лӱмынак пӧчыжым, облепихым, поланым оптена. Черланаш тӱҥалмым шижына гын, вигак нине пайдале саска гыч морсым ыштен йӱына.
Татьяна СТЕПАНОВА, Республикысе Калык усталык да тӱвыра ден каныме паша шотышто шанче-методике рӱдерын тӱҥ администраторжо:
– Кажне кастене шоган ден чеснокым кочкына, чайым эреак шудо йӧре йӱына. Прививкым ом ыште, эмымат йӱмаш уке, утларакшым ик компанийын сатужлан эҥертем.
Роман АЛЕКСЕЕВ, М.Шкетан лӱмеш Марий национальный драме театрын тӱҥ режиссёржо:
– Юалге пагытыште чайым лимон да имбирь дене йӱаш йӧратем. Тыгай йӱыш моткоч тамле да витаминланат поян. Черланымым шижаш тӱҥалмеке, калык медицине дене эмлалтам, ок полшо гын, мутат уке, эмым йӱам.
Виктор КОМАРОВ, мыскараче, мурызо:
– Кажне кечын профилактикым эртарем. Черланаш тӱҥалмым шижам гын, чеснокым кочкам, мӱян шокшо вӱдым йӱам. Моло семын таблеткым йӱаш ом тырше, но южгунам аспирин да монь кӱлеш лийын кая. Прививкым шукертсек ыштыктен омыл. Калык медицинылан эҥертем.
Москошто пашам ыштымем годым, аптечкыштем тӱрлӧ таблетке лийын, но нуным кучылташ пешыжак тыршен омыл.
Алевтина БАЙКОВА
Авторын фотожо
