КУЛЬТУР ДА ИСКУССТВО

У савыктыш: Книга уло, а ынде кином вучена

Шукерте огыл Марий Эл искусствын сулло деятельже, кумдан палыме режиссёр Василий Пектеевын «Мӱкш тӱня марий» книгаже ош тӱням ужо. 

Киноповестьыштыже Василий Александрович марий кундемын 60-шо ийласе илышыжым, йочаж годым сӱретче лияш шонымыжым, ача-аважым, икымше йӧратыме ӱдырым йомдарымыжым, шуко нелытым чытен лекше еҥым тачысе шинчаж дене сӱретла. Книгам лывырге марий йылме дене возымо. Тудын комжым Российын сулло сӱретчыже Иван Ямбердов сӧрастарен.

Кодшо кечылаште ты книган презентацийже эртыш. Тушко тӱвыра, печать да калык-влакын пашашт шотышто министр Константин Иванов, театр пашаеҥ-влак ушем вуйлатыше сомылым жаплан шуктышо Алла Александрова да тыгак авторын лишыл еҥже, йолташыже, коллегыже, тудын творчествыжым эскерыше-влак погыненыт ыле. Кажныже, Василий Александровичын пашажым кӱкшын аклен, поро шомакым ойлыш.

— Василий Александровичын шинчаже кече семын йӱла. Тудын дене кодшо курымын 70-шо ийлаштыжак палыме лийынна, — палемдыш А.Александрова. — Книгам савыктыме моткоч сай, а ындыжым киноповестьше почеш фильмым вучаш тӱҥалына.

В.Пектеевын «Мӱкш тӱня марий» книгажым савыктен лукташ «Марий Эл» газет редакций полшен. Тидын шотышто газетын тӱҥ редакторжо Александр Абдулов тыгерак ойлыш:

— Иктаж пел ий ончыч Василий Александрович кид дене рушла возымо киноповестьшым мый декем конден ыле. А икмыняр жап гыч марлаш кусарымыжым лудаш темлен. Паша гутлаште шергалын лекташ пешыжак ярсен омыл. Но тудын йыҥгыртымыж деч вара  лудын лекташ шонен пыштышым. Оҥайын чучо да мучаш марте лудын лекде шым чыте. Тиде повестьым возаш мо таратен – палем. Сандене тиде книган ош тӱняш лекмыжлан моткоч куаненам.

— Ятыр ий Марий республик деч ӧрдыжтӧ коштынам. Тиде жапыште тӱрлӧ кундемысе театрыште пашам ыштенам. Лач тидыжак кидыш ручкам кучен шинчаш амалым пуэн. Мутлан, куд ий «Мосфильмыште» тыршыме годым ик кече — шуматкече —  каныш лийын. А Карел театрыште лу гыч куд шагат кас марте постановкым сценыш лукташ ямдыленна гын, кастеныже возгалаш жап лийын. А тыгай повестьым сераш шонымаш шукертак шочын. Российын сулло сӱретчыже Иван Ямбердов дене изи годсекак палыме улына. Тудо шке аваже, йоча пагытше нерген шуко каласкален. Ямбердов куд ияшак ачаж деч посна кодын. А аваже шкетын ныл йочам ончен-куштен, колхозын мӱкш отарыштыже пашам ыштен, вет тунам шӱдӧ омарта лийын. Тыгодым аваже колхоз пашашкат моло дене тӧр коштын, — пашаж дене палдара В.Пектеев. — Киноповестьлан Иван Ямбердовын  аважын куштылго огыл илышыж нерген каласкалымыже, шочмо кундемемын историйже, ача-авамын пӱрымашышт, марий сӱан, ӱярня, рошто пайрем-влакын ойыртемышт да молат негызым ыштеныт.

А.Байкова.

Опубликовать в Одноклассники

Добавить комментарий