3 августышто рӱдолаштына куштылго атлетике дене XL Йошкар-Оласе пелемарафон лийын. Тудо Ленин лӱмеш площадьыш Марий Эл, Татарстан, Чуваший, Удмуртий, Башкортостан республикла, тыгак Москва, Санкт – Петербург олала, Калуга, Мурманск, Нижегородский, Ульяновск, Киров областьла гыч участник-влакым чумырен. Пелемарафонышто абсолютный сеҥыше семын Шернур посёлко гыч спортсмен Алексей Ахтямов палемдалтын.
Тудо 21,1 километрым эн писын – ик шагат 7 минут 58 секундышто – куржын эртен.
Пелемарафоныш ушнышо-влак вийыштым кум тӱрлӧ – 5, 10 да 21,1 километр – кужытышто – тергеныт. 21,1 километран тӱҥ дистанцийыште чылаже шӱдӧ утла еҥ таҥасен, а моло кужытлаште – чумыр налмаште шӱдӧ нылле наре.
Пӧръеҥ-влакын тӱшкаштышт икымше верыш лектыныт:
Алексей Ахтямов (21,1 км, Марий Эл) Сергей Семёнов (10 км, Татарстан) Андрей Мошкин (5 км, Марий Эл).
Ӱдырамаш-влак коклаште икымше вер дене палемдалтыныт:
Ася Валеева (21,1 км, Чуваший), Виктория Сосегова (10 км, Киров область), Мария Киселёва (5 км, Марий Эл).
Ӧрдыж кундем гыч толшо участник-влакын мутышт почеш, таҥасымаш трассе Йошкар-Олан ик эн сылне верлаже – шым рӱдӧ уремже – гоч эртен, сандене рӱдола дене лишкырак палыме лияш йӧн лийын. Тидын деч посна тудо Йошкар-Олан гербыштыже сӱретлыме шордын контуржым ушештарен.
Спортсмен-влакын таҥасымашышт годым Ленин площадьыште спорт тунемме рӱдер-влак мастер-класс-шамычым, показательный выступленийым ончыктеныт, тӱрлӧ конкурс ден модышым эртареныт.
Тенийысе ныллымше пелемарафон Йошкар-Олан 440 ийым темымыжлан да Физкультурникын кечыжлан (тудыжо ты гана 10 августлан толеш) пӧлеклалтын. Тудым Марий Эл Спорт да туризм министерстве ден Йошкар-Олас администрацийын полшымышт дене Физический культур, спорт да молодёжь политике виктем эртарен.
Г.Кожевникова
Фотом XL Йошкар-Оласе пелемарафонын соцкылысе лаштыкше гыч налме
