Икмыняр ий ончыч Кужэҥер район Руш Шой селаште типовой фельдшер- акушер у пункт почылтымылан ты кундемыште илыше-влак тачат куанат. У оралтыш миен пурашыжак сай, эмлалташыжат йӧн шукырак. Меат командировкыш мийыме годым тушко пурен лекде ышна керт. Мемнам пеш порын тудым вуйлатыше фельдшер Галина Охотникова вашлие. Тудо лачак эмлымверыш икшывыжым ончыкташ кондышо самырык ӱдырамашым ужата ыле.
Галина Михайловна Уржум медучилище деч вара шочмо велыш фельдшерлан пӧртылын. Ынде 28 ий наре тыште пашам ышта. Ончычшо ФАП-ыште амбулаторий да стационар лийыныт, но оралтышт тоштемын. Варажым стационаржымат петыреныт. Тунам ӱдырамаш патронажный сестралан ышташ тӱҥалын. Галина шке жапыштыже шочмо Шойдӱҥ ялысе рвезыланак марлан лектын. Варажым ешыж дене Руш Шой селашке илаш кусненыт, оралтым ыштеныт.
У ФАП-ым почмым вуйлатышат сайлан шотла. Вет тошто оралтыште шонданат уремыште лийын. Таче тышке ты кундемысе вич ял гыч еҥ-влак эмлалташ коштыт: Шойдӱҥ, Саламатнур, Аганур, Кульшит да Руш Шой гыч. Чылаже 960 наре еҥ погына. «Тидыже шуко», — манеш фельдшер. Илалше-шамычат шагалын огытыл, эсогыл 90 ийым эртыше-шамычат улыт. Школыш 172 икшыве коштеш гын, йочасадыш — 50 утларак.
Кум ий ончыч ФАП-лан у оралтым нӧлтымеке, калыкым эмлаш чынжымак куштылгырак да йӧнанрак лийын. Кабинет-влакым келыштарыме. Физиокабинетат уло, оборудований куштылыграк черан-влаклан полышым пуаш ситышын. Верысе калык утларакшым кылмыме, шылыж черланыме годым полышым йодын толеш. Еҥ-влак нине чер дене шукын черланат. Шылыж, йыжыҥ корштымыжо ял калыкын неле пашам ыштымыж денат кылдалтын, палемдыш фельдшер.
Тазалыкым аралыме дене кылдалтше национальный приоритетный программе дене келшышынат полыш уке огыл. Кажне кварталлан ик гана терапевт, кажне тылзын педиатр толыт. Диспансеризацийым чыла школышто эртарат. Могай врач огеш сите, Йошкар-Ола, Советский поселко гычат кондат. Идалыклан ик гана флюорографий машинат толеш. Тидыже илалше-влакым тергаш моткоч йӧнан. Нунылан райрӱдыш шумеш кудалышташ огеш кӱл. Кужэҥер районысо рӱдӧ эмлымверын тӱҥ врачшат эреак полшаш кумылан. Кӱлмӧ годым еҥ-влакым районыш, Йошкар-Олаш наҥгаяш машинамат эре ойыра. Молгунамже Галина Михайловна шкежат вашеполышым ӱжыкта.
С.НОСОВА
М.Скобелевын фотожо
