2-10 мартыште Марий Элыште Россий кӱкшытан «Профессионал-влак» чемпионатын регионысо этапше лиеш.
Тудо «Молодёжь да йоча-влак» национальный проектын «Профессионалитет» федеральный проектше кышкарыште эртаралтеш.
Таҥасымашлаште кыдалаш профессионал образованийым пуышо организацийыште да школышто тунемше кумшӱдӧ утла ӱдыр-рвезе чумыр налмаште 50 компетенций дене профессионал мастарлыкым ончыкташ тӱҥалеш.
Тыгай чемпионатын кӱлешлыкше нерген Марий Элым вуйлатыше Юрий Зайцев тыге каласен: «Элнан президентше Владимир Владимирович Путин Россий Федерацийын вияҥме национальный цельжым палемден: кажне айдемын куатшым пайдалын кучылташ, тудын моштымашыжым вияҥдаш, патриотизм шӱлышан да социальный могырым мутым кучышо личностьым ышташ. Тиде шонымашыш шуаш манын, «Профессионалитет» модель полшымо дене элна мучко кыдалаш образований системе уэмдалтеш. Россий кӱкшытан чемпионат толкын – ты модельын ик эн пайдале йӧнжӧ. Таҥасымаш-влак кызытсе илышлан ик эн кӱлешан компетенцийла дене эртат, тыге кадр резервым сай специалист-влак дене пойдараш йӧн ышталтеш».
Таҥасымаш-влак республикысе 15 колледж ден техникумышто эртаралташ тӱҥалыт. Предприятий-партнёр-шамычым конкурс заданийым ямдылымашке, жюришке ушымо.
Чемпионатыште сай результатым ончыктышо участник-шамыч республикнан ик эн ончыл предприятийыште стажировкым эртат. Тений тыгай йӧным 76 организаций пуа – чылаже 230 верым ойыра.
Авторын фотожо
