Тиде кечылаште Йошкар-Оласе Чарла кремльыште Кугече арнялан пӧлеклалтше ярмиҥга лийын. Тудым республикын Ялозанлык да кочкыш сату министерствыже Марий епархий дене пырля эртарен.
Кремльыш пурымаште калык Йошкар-Ола да Марий митрополит Иоанным ош роза пеледыш да кулич дене вашлийын. Тудым поро мутшо деч вара Марий Эл правительстве председательын икымше алмаштышыже Михаил Васютин регионым вуйлатыше Юрий Зайцевын саламлымашыжым лудын. Ты гана Кугече ярмиҥгаште кидмастар, мӱкшызӧ, шке озанлыкым кучышо-влак ятырын лийыныт. Нуно калыклан пашаштым, сатуштым уло кумылын темленыт. Ярмингаш мийыше еҥ-шамычым Республикысе марий да руш тӱвыра рӱдер-влак пайрем концерт дене куандареныт. Йошкар-Ола да Марий митрополит Иоанным да уна-влакым У Торъял район Тошто Торъял села гыч «Ший оҥгыр» ансамбльын участникше-шамыч тутло пулашкамуно, пура, мелна дене сийленыт. Ансамбльым вуйлатыше каласен: «Ме кажне Кугечылан Йошкар-Олаш уло кумылын толына».
Ярмиҥгаште сату, чынжымак, шуко да тӱрлӧ лийын. Мутлан, Протасовмыт еш пу ате-шамычым, мебельым темлен, а Йошкар-Ола гыч апшат Роман Тетешев – каминлан, коҥгалан келшыше да моло ӱзгарым. Тудо тыгак мастер-классымат ончыктен: кызытсе оборудований дене имне таганым тапташ туныктен.
Курыкмарий район Ямангаш села гыч Александр Титов ден Ксения уныкаже корзиҥгам, шоганым, пареҥгым ужалаш конденыт. Шанчара гыч баянист Василий Петухов ачалыме, шке да фабрикыште ыштыме гармоньым, баяным темлен. Да темлен веле огыл – тошто семым шокталтен колтыде чытен огыл! «Мый Кировысо музыкальный училищым тунем пытаренам, профессионал баянист улам. Тошто грамоньым, баяным, балалайкым ачалем. Марий Элын гармоньчыжо-влакым сайын палем», – каласен тудо.
Кугече ярмингаште эн оҥайже – чаҥым кырыме тат. Пиалым йодын, тидым кажныжак ышташ тыршен. Нунын коклаште кумдан палыме сӱретчына Иван Ямбердоват лийын. Икманаш, Кугече шӱлышан шошо южым чылаштымат авалтен кертын.
М.СКОБЕЛЕВ
Авторын фотожо
