Кучемыште

Бюджетыш – вашталтышым, илышыш – у законым

Кугыжаныш Погын регионым вуйлатыше Юрий Зайцевын ончаш темлыме кок законын проектшым пеҥгыдемден.

10 ноябрьыште марий парламентын луымшо сессийже лийын.

Депутат-шамыч, эн кӱлешан пашалан палемдалтше оксам социальный выплатым ышташ да СВО-н участникше-влаклан полшаш ойырен, республикын 2026 ийысе бюджетшым радамленыт.

Марий Элын 2026 ийысе да 2027-2028 ийласе  бюджетышкыже вашталтышым пуртымо нерген законын проектше дене республикын финанс министрже Алексей Торощин палдарен.

Бюджет окса ик эн кӱлешан роскотлан: граждан-шамычлан пашадар ден социальный выплатым тӱлаш, лӱмын тӱҥалме сарзе операцийлан полшаш – виктаралтын.

2026 ийысе доходым 2 013,6 миллион теҥгелан иземдыме. Тыгай вашталтышым тений 9 тылзыште пурышо да идалык мучаш марте пурышаш оксам шотлен лукмо негызеш ыштыме. Налог ден налог огыл доход 2 106,4 миллион теҥгелан иземеш, федеральный бюджет да тӱрлӧ фонд гыч пӧртылтыде пурышо средства 92,8 миллион теҥге марте кугемеш.

Алексей Торощинын ончылгоч шотлен лукмыж почеш, идалык мучашлан парыш, НДФЛ, алкоголь ден нефть продуктлан акциз-влак, транспорт налог шотышто пурышаш окса палынак шагал лиеш.

Роскотым бюджет-влак кӧргыштӧ шеледыме, счётышто кодшо «целевой» оксам, ты шотыштак Корно фондын средстважым, кучылтмо. Роскотын икмыняр ужашыжым бюджет обязательствым налдыме да анык кӱшеш иземдыме. Тидым Россий Федераций президентын кӱштымашыжым да Марий Элын 2026-2030 ийласе кугыжаныш финансшым тазаҥдыме программым шуктымо кышкарыште ыштыме.

Единый счётышто кодшо окса ден федеральный бюджет гыч колтымо трансфертым бюджет-влак коклаште шукырак кучылтмым шотыш налын, роскотын 1 030,9 миллион теҥгелан кугеммыжым рашемдыме.

Лӱмын тӱҥалме сарзе операцийын участникше-шамычлан полшаш, ты шотыштак пашадарым тӱлаш ден СВО дене кылдалтше мероприятий-влакым эртараш, резервыш 688,5 миллион теҥгем пыштыме.

Муниципал образований-влаклан окса полышым иземдыме.

Бюджетын дефицитшым 3 044,5 миллион теҥгелан кугемдыме. Дефицит ден кугыжаныш парым Бюджет кодексыште да Россий Минфинын соглашенийыштыже ончыктымо значений деч кугу огыл.

Пуртымо чыла вашталтышым шотыш налын, республикын 2026 ийысе бюджетшым тыгай параметрыште пеҥгыдемдыме: доход – 71 163,5 миллион теҥге, роскот – 77 577 миллион теҥге, дефицит – 6 413, 4 миллион теҥге.

2027-2028 ийласе доход ден роскотым вашталтыме огыл.

Сессийын паша радамышкыже пуртымо кокымшо йодыш Марий Элыште вейпым розницыш ужалаш чарыме нерген у законын проектше дене кылдалтын.  

Документым федеральный законодательствын Россий Федерацийысе субъект-влаклан пуымо правам илышыш пуртымо кышкарыште ямдылыме. Тудын дене келшышын, республикыштына 2027 ий 1 март гыч 2032 ий 1 март йотке электрон системе-влаклан никотин ден вишкыде средствым розницыш ужалаш чарыме. Закон 2027 ий 1 март гыч вийыш пура.

2026 ий 7 ноябрьлан налмаште тыгай законым Россий Федерацийын 17 субъектыштыже, ты шотыштак пошкудо Нижний Новгород, Саратов, Ульяновск да Пенза областьлаште, Пермь крайыште, Удмурт да Чуваш республиклаште приниматлыме. Эше 39 регионышто законын проектше – ямдылен шуктымо але ончымо йыжыҥлаште.

Тыге, республикна вейпым шке кундемыште розницыш ужалаш чараш лийме права дене ик эн ончыч пайдаланыше регион-влак коклашке пурен. Тыгай йӧн 2026 ий 26 июньышто Федеральный закон дене ышталтын. Пунчал граждан-влакын, эн ончычак ийготыш шудымо да самырык-шамычын, тазалыкыштым никотинлан тунемалтме деч аралымашке виктаралтын. Регионлаште илышыш пуртымо тыгай чарымаш законын пайдалыкшым аклаш полшышо пилотный механизмлан шотлалтеш.

Российысе пульмонолог-шамычын палдарымышт почеш, пытартыш ийлаште вейп дене пайдаланымылан кӧра нелын черланыше пациент-влак 30 процентлан ешаралтыныт. Поснак подростко ден 35 ияш марте ийготан самырык еҥ-влакын тыгай койышышт тургыжландара, вет нине граждан-шамыч элнан ончыкылыкшо да паша резервше улыт.

Марий Элын промышленность, экономике вияҥмаш да сатулымаш министрже Владимир Халюзинын палемдымыж гыч, таче тыгай сатум 56 точкышто ужалат. У закон дене келшышын, нуно чыланат 2027 ий 1 март йотке ассортиментыштым вашталтышаш улыт.

– Законым приниматлыме деч ончыч проектым парламентыште радамын лончылымо. Тудым амалкалче-шамычын праваштым аралыме шотышто уполномоченныят ончен. Да чыланат тыгай иктешлымашым ыштенна: вейпым ужалаш чарыме дене бизнес шукыжак огеш йомдаре, республикын экономикыж ден бюджетшыланат кугу зиян огеш лий, а йоча-влак таза кушшаш улыт, – сессий деч вара журналист-шамыч дене вашлийын мутланымыж годым палемдыш депутат, Республикысе туберкулёз ваштареш кучедалме диспансерын шодо-хирургий отделенийжым вуйлатыше Максим Бронников.

Маргарита ИВАНОВА.

Марий Эл Кугыжаныш Погынын пресс-службыжын фотожо.

 

 

Добавить комментарий