17-19 июльышто Чыкмаште мыскара да койдарчык «Васюки Фест» фестиваль эртен.
Тымарте, 30 ий утла манаш лиеш, тудо «Бендериаде» маналтын. Организатор-влак пайремлан у сыным пурташ, вияҥдаш шонен, лӱмжым вашталтеныт. Пытартыш ийлаште фестивальым ончаш олашке лӱмын турист-влак толын каят. Тӱвыра программе кум кече жапыште икмыняр площадкыште кая: тӱҥ сценыште, паркыште, Юл эҥерын причалже дене. Ты кечын уло ола гӱжла, пайрем кумыл дене авалталтеш.
– Козьмодемьянск шукертак путешественник-влакым шке деке шупшшо олаш савырнен. Тений оласе калыклан, турист-шамычлан эшеат йӧнанрак, оҥайрак, веселарак лийже манын, чыла ыштенна, – серен шке Telegram-каналыштыже регион вуйлатыше Юрий Зайцев фестиваль деч ончыч.
Пайремын деловой программыже туризм отрасльын вӱдышӧ экспертше-влакым чумырен. Вашлиймаш изи ола-влакым вияҥдаш полшен кертше событийный туризмлан пӧлеклалтын. Тушто Козьмодемьянск ден Йошкар-Олан турист йӧнжӧ-влак дене палдареныт.
Молгунамсе семынак пайрем причал гыч Остап Бенедерым вашлиймаш дене тӱҥалын. А тиде вашлиймашыже кажне гана кугу шоу семын эрта да икшырымын карнавал шествийыш кусна. Тений Бендерым олан мэрже Михаил Козлов ден оласе образований вуйлатыше Игорь Волков вашлияш лектыныт.
Пайем калыкым Марий Элын промышленность, экономике вияҥмаш да торговльо министрже Владимир Халюзин саламлаш миен. Событийный туризм шотышто «Russian Event Awards» тӱнямбал премийым негызлыше, «Консалтинг-Тур» ООО-н генеральный директоржо Геннадий Шаталоват поро тыланымашым ойлен.
Таче Чыкма ола гоч «Великий Волжский путь» федерал турист маршрут эрта. Кажне ийын 170 тӱжем наре турист толеш. Тений гына фестивальыш 19 тӱжем наре еҥ лӱмын толын. Тиде фестивальын кӱлешлыкше нерген ойла огыл мо? Программыжат мыскара да койдарчык сынан, кумылым нӧлтышӧ, тачысе саманыште калыклан тиде кӱлеш. Кумло ий пагытыште пайрем кышкарыште йӱлаш пурышо кажне мероприятийже вучымыш савырнен. Мутлан, кидмастар-влакын кугу ярмиҥгашт, колызо-влакын конкурсышт, таракан-шамычын куржталмашышт, карнавал шествий, лӱмлӧ гроссмейстер дене шахматла иканаште икмыняр еҥын модмаш, пӱкеным аукцион гоч ужалымаш, КВН… Тений, мутлан, шахмат дене 45 партий модылтын. Шукыж годым гроссмейстер сеҥышыш лектын. Ты гана Марий Элыште веле огыл, Юл кундемыштат палыме, ик гана веле огыл чемпион лӱмым сулен налше Константин Житников лийын.
Ильф ден Петровын «12 стульев» романже гыч Чыкма олан историйышкыже куснышо бриллиантан пӱкеным ужалыме аукцион деч посна кузе? Саде бриллиантет мадам Петухован мебель гарнитуржым налаш кумылан ик ӱдырамашлан логалын.
«Васюки Фест» фестивальын кубокшылан КВН модышышто Йошкар-Ола гыч команде сеҥышыш лектын. А тудын ик участницыже Анна Москвичева «Эн сай ӱдырамаш роль» номинацийыште да посна приз дене палемдалтын.
Фестивальын ик эн ӧрыктарен куандарыше мероприятийже, мутат уке, карнавал шествий. Чыкма оласе организаций, предприятий-влак тушко ушнат. Кажныже шкенжын колонныжым ойыртемалтшым ышташ тырша. Чылан гаяк тематике дене келшен толшо костюмым чият. Чынжымак, тидым шке ужаш оҥай да весела. Эшежым карнавалыште ойыртемалтше-влакым кажне гана палемдат. Тений Гран-прим «Потенциал» заводын командыже сеҥен налын.
Светлана Носова
Фотом фестивальын воткыл лашыкше гыч налме.
