13 декабрьыште Э.Сапаев лӱмеш опер да балет академический театрыште Йошкар-Олаште профессиональный балет школым почмылан 25 ий теммылан пӧлеклалтше гала-концерт эртен.
Артистын пӱрымашыже
Тудо ик актан «FATUM танца» балет дене почылто. Тӱҥ партийым театрын художественный вуйлатышыже Константин Иванов куштен. Молан лачшымак тудо? Театрыш икымше гана толшым тыгай йодыш тургыжландара ыле, очыни. Тиде балетым Российыште кумдан палыме хореограф Константин Уральский кок ий ончыч Российын сулло артистше, Марий Элын калык артистше Константин Ивановын балет дене кылым кучаш тӱҥалмыжлан 30 ий темме лӱмеш ямдылен. Ты постановкышто артистын пӱрымашыже – балет школыш тунемаш толмыжо, икымше педагог-влак дене занятийлаште лиймыж гыч тӱҥалын, кумдан палыме артист марте кушмыжо – сайын почылтеш. Кучем еҥын балетым куштымыжым ончаш – кугу куан. Шке пашажым сайын палыше да ты аланыште профессионал гына тыге чаплын, куатлын кумылым нӧлта, куштымаш йылме дене содержанийым почын пуа. Вуйлатыме пашаж деч посна Константин Анатольевич кызытат профессиональный формышто шкенжым куча, тидыж денак шке тунемшыже-влаклан примерым ончыкта. Зал тич погынышо-влакат чыла тидым умыленыт, садлан шокшо кидсовыш дене веле огыл, «Браво!» шомак денат тауштеныт.
Сценыште тыгак балет школын тӱрлӧ ийласе выпускникше ден искусствын тиде йогынышкыжо икымше ошкылым ыштыше ӱдыр-рвезе-влак мастарлыкым ончыктеныт.
Ятыр шӱдырым кушта
Республикнан рӱдолаштыже балет школ 1999 ийыште Бауман лицейыште почылтын. Темлымашыже лач Константин Ивановынак лийын да чылажат шонымыж семын вияҥын. Ты школым тунемын лекше-влакын паша корнышт вик опер да балет театрыштак тӱҥалеш. Икымше выпускышто тунемше чыла ӱдыр-рвезе балет искусствышто кумдан чапланеныт. Кызыт театрын балет труппыштыжо шкенан балет школым тунем лекше-шамычак улыт. Нуно тыштак шочын-кушкыныт да изишт годсекак шочмо калыкнан тӱвыражлан, йӱлажлан шӱман улыт. Эше тунеммышт годымак ончыкыжым Э.Сапаев лӱмеш опер да балет театрын сценыштыже кушташ, театрын да марий балетын историйжым возаш, шочмо мландынан чапшым Российыште да йот эллаште аралаш тӱҥалшаш нерген паленыт.
– Балет школ мыйынат илышем йӧршын вестӱрлым ыштен. Изинекак мураш йӧратенам, но икана телевизор дене балетым куштышо ӱдыр-влакым ужынам да мыйынат нунын семын куштымем шуын. Тидын нерген авамлан ойленам да ты школыш наҥгаяш темленам, – шыргыжалын шарналта театрын вӱдышӧ балериныже Валерия Волкова. – Тергымашым эртышым да тыге профессиональный балет школышто тунемаш тӱҥальым. Ынде визымше ий балет труппышто улам, утларакше тӱҥ партийым куштем, мутлан, «Щелкунчикыште» – Машам, «Дон Кихот» балетыште – Китрим… Кушташ моткоч йӧратем, тидын дене мый канем да калыкым куандарем.
Концертын кокымшо ужашыштыже балет школын тунемшыже-влак театрын артистше-шамыч дене пырля «Пахита» балет гыч ужашлам куштеныт. Изирак-влаклан профессионал-шамыч дене кушташ, мутат уке, кугу чап. Лач нуным ончен, икшыве-влак кушкыт, мастарлыкым шуарат да жап эртымеке, нунат волгыдо шӱдыр семын кундемнан лӱмжым чапландараш тӱҥалыт.
Иктешлыме семын
Пайрем шӱлышан кас кажнын чоныш куаным пуртен да кугешнаш таратен. Профессионал-влак дене пырля тӱҥалше артист-влакат шкештым сценыште ӱшанлын кученыт. Тидыжак огыл мо республикыштына балетын кӱкшытшӧ нерген ойла? Балет школын ӱмыржӧ кужу лийже, тек тудо шуко шӱдырым кумда тӱняш луктеш.
Алевтина БАЙКОВА
Е.Никифоровын фотожо
