Пошкырт вел Калтаса районысо Кӧкыш ялыште шочын-кушшо, а кызыт Советский район Кодам ялысе тӱвыра пӧрт вуйлатышылан тыршыше Виктор Ачибаевым мастар гармонист семын шукын палат. Семӱзгарым темдышташ кӧм ончен тунемын? Тидын шотышто Марий Эл культурын сулло пашаеҥже тыгерак каласыш:
– Шочмо ялыштем ончыч гармоньым шукын шоктеныт, иктаж латвизытынат, очыни. Мыйынат тиде мастарлыклан тунеммем шуын да шке ял гычак гармонист Сергей Тимиров кузе темдышташ кӱлмым ончыктен. Тӱҥалтыште пурла, а вара шола могыр дене шокташ тунемынам. Тунам иктаж кудымшо-шымше классыште лийынам. Гармоньым шокташ тунемын шумеке, пошкудо яллашкат пайремым сӧрастараш ӱжыныт. Но мылам авамын мурымыж почеш шокташ чотырак келшен. Тудо мураш пеш кертын. Кугурак лиймеке, ял клубыш гармонь сем почеш кушташ погыненна: эр марте тушто лийынна, а вара шудо солаш каенна. Ик жап гыч тоштемше клубнажымат петыреныт. Тунам ме ял вуйыш чумыргенна: гармонь почеш «Еш поген», «Вич мужыр», «Кандыра» да моло куштымашым куштенна, тӱрлӧ семын модынна, муренна. Чылт концерт гай жап эртен. Кызытат тидын нерген чӱчкыдынак порын шарналтем.
А.БАЙКОВА
Фотом еш альбом гыч налме
