Еш, йӧратымаш да ӱшанле улмо кече молгунамсе семынак теният республикнан рӱдолаштыже кумдан палемдалте. Тудлан пӧлеклалтше мероприятий-влак 7 июльышто, рушарнян, эртаралтыч.
Пётр ден Феврония толыныт
Эн ончычак 11 шагат эрдене Изи Какшан эҥер дене шнуй Пётр ден Феврония Муромскиймыт ладья дене Йошкар-Оласе Патриарший площадьыш тольыч. Нуно погынышо-влаклан эн ончычак шке ешышт нерген каласкалышт, а вара шушаш пайрем дене саламлышт да чылаштлан пиалан еш илышым, йӧратымашым тыланышт. Умбакыже, шкештат да меат, погынышо-шамыч, темлымышт почеш «йӧратымаш» капка гоч эртен, площадьыште верланыше Благовещенский собор деке тӱшкан ошкылна. Ты собор гыч священик лекте да тудат еҥ-влакым пайрем дене саламлыш.
Еш-влакым саламлышт
14 шагатлан Йошкар-Оласе тӱвыра да каныме рӱдӧ паркыште мероприятийын торжественный ужашыже тӱҥале. Тушко погынышо-влакым шушаш пайрем дене саламлаш Марий Эл вуйлатыше Юрий Зайцев толын ыле. Тудо тыге ойлыш:
– Пайрем тений поснак ойыртемалтше, молан манаш гын ты ийым элнан президентше Владимир Владимирович Путин Еш идалык семын увертарен. Молгунамсе семынак, но тений поснак кугу куан дене, шуко шочшан еш-влаклан республикын правительствыжын пуымо полыш мерыжым эшеат кумдаҥдена. Марий Элыште тыгай еш 12 тӱжем утла улыда. Мутат уке, ме иктыжымат мондаш огыл манын тыршена. Кунам икшывым сайын ончен куштымылан наградым кучыктышаш нерген шонымаш шочын, тидым ышташак кӱлмӧ шотышто нимогай коктытеланымаш лийын огыл. Молан манаш гын кажне авалан да ачалан тауштымаш – тиде эн ончычак сай икшыве-влак. Да адакшым нуно шотан айдеме да чын патриот лийыт гын, тидлан нунын авашт ден ачаштлан таум ыштыман.
Пагалыме йолташ-влак, тендам пайрем дене саламлем. Тиде – волгыдо пайрем. Ме тендам, ешым чумырышо-влакым, чапландарена. Йоча-шамычлан чын айдеме кушкаш тыланем. А ава ден ача-влаклан мланде марте вуйнам савена. Тау тыланда.
Тылеч вара республик вуйлатыше Волжский район гыч Наталия Васильевалан «Героиня-ава» орденым кучыктыш. Наталия ден Владимир пелашыже 16 икшывым: шкеныштын 11 ӱдыр-эргыштым да ашнаш налме 5 йочам – ончен куштат.
Умбакыже Юрий Зайцев Марий Эл Республик Вуйлатышын «Икшывым сайын ончен куштымылан» почетан знакше дене 5 ешым палемдыш. Тиде наградым тудо Галина ден Алексей Ивановмытлан, Татьяна ден Алексей Куклинмытлан, Винира Магсумовалан, Светлана ден Андрей Романовмытлан, Светлана ден Александр Шуталевмытлан кучыктыш.
Республик вуйлатышына шкежат награде дене палемдалте: тиде торжественный мероприятий жапыштак правительстве председательын икымше алмаштышыже Михаил Васютин Юрий Зайцевлан «Всей семьей» Российысе проектым илышыш пурташ полшымылан да пайдале вашкыллан ты проект вуйлатышын тауштымашыжым кучыктыш.
Умбакыже республикысе тӱрлӧ район гыч чылаже 17 ешым «За любовь и верность» медаль дене палемдышт. «Идалыкын ешыже» республиканский конкурсышто сеҥыше-влакымат ты мероприятийыштак саламлышт. Мутат уке, чылаштлан пӧлекым кучыктышт. Тылеч посна нуным да пайремыш толшо-влакым шке выступленийышт дене усталык коллектив ден посна мурызо-влак куандарышт.
Мероприятий кайыме годымак СВО-што улшо-влаклан полшаш оксам погымо поро кумылым ончыктымо ярмиҥга ты паркыштак эртен.
А тиде жапыште …
Саламлымаш тӱвыра да каныме рӱдӧ паркын эстраде аланыштыже лие. Тудын воктеныжат пӱтынь кумдыкышто пайрем шӱлыш озаланен, вет тыште 13 гыч 17 шагат марте мастарлык класс-влак, кидмастар-шамычын тӱрлӧ тематический ончерышт эртаралтыныт.
Тидын нерген шарналтымеке, мый ик жаплан эстраде алан гыч лектым да парк мучко ончен савырнышым гын, тушто кӧ да мом гына ышташ огеш темле ыле?! Кидмастар-шамыч мо гыч да могай гына ӱзгарым, арверым, чиемым, сӧрастарышым налаш темлен огытыл?!
Эн ончычак корныштем кумда палатке логале. Тушто кумылан кажне еҥ кондымо кугу ора висвис пеледыш гыч вуйшӱдышым ыштен да шканже мӧҥгышкыжӧ наҥгаен кертын. Санденак тыгай кумыланже тудын кӧргыштыжӧ моткочак шукын улыт ыле. Адакшым икте ыштен да каен, весе толын. Мыйже молан ыжым ыште? Тыгай йӧн дене молан ыжым пайдалане гын? Эх, жалке! Ыштем гын, вуйшӱдышем ончалмем еда кажне гана тиде пайремым кумыл нӧлтын шарналтем ыле.
Темленыт тыгак, мутлан, вате-марийлан але эше келшыше гына мужырлан икте-весыштын ваш-ваш келшен толмыштым, койыш-шоктышыштым палымыштым тергаш экспресс-тестым эрташ.
Икшыве-влак гын кагаз гыч пеледышым, тӱрлӧ материал гыч «тортым» ыштен да сӧрастарен, конструкторым поген, чурийышкышт аквагримым ыштыктен кертыныт.
Иктаж-кунам жаритлыме мороженыйым кочкында? Мыят але марте уке ыле. А тыште тыгай йӧн пуалтын. Конешне, оксала. Секрет почеш каласем: мый яра кочкын ончышым. Моткочак тамле! Арам огыл тушко кужу черет шога ыле.
Тораштак огыл СВО-шко колташ ямдылыме сорталашке пижыкташ салтак-шамычлан тыланымашым сераш темленыт. Тушко мыят ушнышым да тыланымашем марла возышым. Марий рвезе ден пӧръеҥна-шамыч тушто шагалын огытыл. Сандене иктаж марий еҥланак логалеш гын, илыше пӧртылаш тыланымым, мемнан вучымына нерген шочмо йылмыж дене возымым лудын, чонжылан сайын чучеш да куана манын ӱшанем.
Концерт, кино, шоу
Тиде кечын оласе Сеҥымаш паркыштат мероприятий-влак эртаралтыныт. Тушто 16 шагатлан уло ешлан «Таза тукым» спорт программе лийын. Умбакыже кумылан-влак «Еш – пиал отро» модыш программыш ушнен кертыныт. А кастене кава йымалне «Пара из будущего» фильмым ончыктеныт.
Тӱвыра да каныме рӱдӧ паркыште еш-влакым саламлымаш мучашлалтмеке, 17 шагатлан Никонов площадьыште республикысе артист-влак концертым ончыктышт. Тылеч вара Москва гыч толшо уна Александр Добронравов погынышо-влакым шке мурылаж дене куандарыш. Умбакыже мемнан чапланыше мурызына Михаил Мосунов ден «АППЕРКОТ» группо калык ончыко лектыч.
Еш, йӧратымаш да ӱшанле улмо кечылан пӧлеклалтше пайрем 21 шагатлан тӱвыра да каныме рӱдӧ паркыште «Колесо обозрения» аттракционышто светомузыкальный шоум ончыктымо дене мучашлалте.
Икманаш, тиде кечын уло еш дене сайын каналташ йӧн пуалтын. Тиде, чынжымак, еш пайрем лийын.
Любовь Камалетдинова
Авторын да М.Скобелевын фотошт
