УВЕР ЙОГЫН

Арняште кок гана вашлийыныт

Эртыше арнян Марий Эл Кугыжаныш Погынын депутатше-влак, кечым коден, кок гана вашлийыныт: Депутатын кечыштыже да 28-ше сессийыште.

Депутатын кечыже

Тудо 28 июньышто «Марий Эл» ий полатыште эртен.  Мероприятий республикыштына веле огыл, элыштынажат ик эн чапле спорт объектын пашаж дене палыме лийме гыч тӱҥалын. Кугыжаныш Погынын председательже Анатолий Смирновын палемдымыж почеш, физкультур ден спорт калыкын, поснак самырык тукымын, тазалыкшым пеҥгыдемдымаште ик эн кӱлешан верым налыт, сандене кугыжаныш тиде аланым умбакыжат ик эн ончыч вияҥдаш тӱҥалеш.

Ий полатын директоржо Андрей Сидоркин депутат-влаклан экскурсийым эртарен: ий ареным, федеральный средства кӱшеш налын шындыме тӱрлӧ оборудованиян пеш чапле тренажёр зал-влакым ончыктен. Тушто спортын ий видше-влакым вияҥдыме школыш коштшо йоча-влак чылт яра заниматлалтыт. Полат пеленысе спорт чап музейым вуйлатыше Иван Малинин марий спортын эн волгыдо йыжыҥже да геройжо-шамыч дене оҥайын каласкален палдарен.

Депутат кечын «Марий Эл Республикыште спорт ден физический культурым вияҥдымаш» тӱҥ докладым регионын молодёжный политике, спорт да туризм министрже Лидия Батюкован ыштен. Тудо республикыште чоҥен шуктыдымо спорт объект-влакын состоянийышт дене палдарен, министерствын ведомствыштыжо улшо икмыняр объектым уэмден да капитально чоҥымо йодышлам рашемден, спорт сооружений ден таҥасымашлам финансироватлыме радам нерген каласкален.

Министрын мутшо почеш, физкультур да спорт дене пеҥгыде кылым кучышо еҥ-влак ий еда шукемыт да кызыт тиде чот 52,3 процентыш шуын.

Депутат-влак «Спорт – илышын нормыжо» федеральный программым илышыш пуртымо кышкарыште министерствын спортым вияҥдыме тӱҥ корныжо, аккредитоватлыме спорт федераций-шамычын пашашт, ГТО тестированийын рӱдерже-влакым почмо, тренер ден вӱдышӧ спортсмен-шамычлан грант дене полшымо нерген пален налыныт да йоча-юношестве спортым вияҥдыме, спорт секцийлам яра организоватлыме, регионысо спорт инфраструктурын кызыт улшо йӧнжӧ-шамыч дене пайдаланыме, спортын тӱрлӧ видше дене команде-влакым ямдылыме шотышто йодышлам нӧлталыныт. Тылеч посна кудывече спортым вияҥдыме, Йошкар-Олаште Какшан эҥер вес велысе кундемыште спорт инфраструктурым чоҥымо, спорт федераций-влакым финансироватлыме, Козьмодемьянск олаште стадионым чоҥымо пашам контрольыш налме да шуко моло нерген чон йӱлен ойленыт.

28-ше сессий

30 июньышто Марий Эл Кугыжаныш Погынын 28-ше сессийже лийын. Тиде кечын депутат-влак республик кӱкшытан 7 закон ден Кугыжаныш Погынын 15 пунчалжым пеҥгыдемденыт.

Нуно эн ончычак республик бюджетын 2021 ийыште шукталтмыж нерген отчётым пеҥгыдемденыт. Тиде йодыш дене докладым Марий Элын финанс министрже Алексей Торощин ыштен. Тудын палемдымыж почеш, ӱмаште бюджетыш 49,9 миллиард теҥге пурен, тидыже ончылийысе деч 5 миллиард теҥгелан шукырак. Роскотлан 46,2 миллиард теҥгем кучылтмо. 2021 ийыште Марий Элын кугыжаныш парымжым 1,4 миллиард теҥгелан иземдыме, да идалык мучашлан тудо 10,5 миллиард теҥге лийын.

Парламентарий Марий Элым вуйлатышын пашажым жаплан шуктышо Юрий Зайцевын темлыме «Марий Эл Республикын пайрем да шарнымашан датыже-влак нерген» законым ик йӱк дене приниматленыт. Кугыжаныш Погынын председательже Анатолий Смирновын умылтарымыж почеш, закон ий еда 4 ноябрьыште палемдалтше Марий Эл Республикын кечыжлан кугыжаныш статусым пуа, тыгак шошо агам мучашлымылан пӧлеклалтше Пеледыш пайремым эртарыме жапым пеҥгыдемда. Закон дене келшышын, ынде Пеледыш пайрем июньын икымше шуматкечынже республикысе села ден посёлкылаште эрта, кокымшо шуматкечынже – райрӱдылаште да Волжск, Козьмодемьянск, Звенигово олалаште, кумшо арнянже – Йошкар-Олаште. Шарнымашан моло дате Марий Элым вуйлатышын пунчалже дене палемдалташ тӱҥалыт.

Депутат-влак социальный полыш мере-шамыч нерген законодательствыш пуртымо вашталтыш денат ик йӱк дене келшеныт. Марий Элын калык илышым вияҥдыме шотышто министрже Марина Островскаян палемдымыж почеш, тиде вашталтыш регионысо ава капиталым, 68377 теҥгем, тӱнен илыше ешлан  кумшо да тылеч моло йочам ыштымыж (эргылыкеш але ӱдырлыкеш налмыж) деч вара ик ий гыч налаш правам пуа. Тымарте тыгай выплатым ешын нылымше йочам ыштымыже але ашнаш налмыж годым веле тӱленыт. Тудым ий еда изи доходан 200-230 еш налын. Ынде тиде чот кугемшаш, да 2023 ийыште регионысо ава капиталым ик гана ойыраш 21,5 миллион теҥге кӱлеш лиеш.

Депутат-влак коррупций ваштареш законодательствыш пуртымо вашталтыш денат келшеныт. Марий Элын пӱртӱс поянлык, экологий да йырвелым аралыме шотышто министрже Алексей Киселевын палемдымыж почеш, тиде вашталтыш лесничий-влакым, мутлан, чодыра пожарым йӧртымашке ушаш йӧным ышта, уке гын тымарте нуно тӱҥ пашаштым веле шуктен кертыныт.

Сессийыште тыгак калыкын йодмыж почеш Петричата ялым У Торъял посёлко дене ушымо нерген пунчалым луктыныт.

Парламентарий депутат, Кугыжаныш Погын председательын алмаштышыже Евгений Кузьминын полномочийжым жап деч ончыч чарен шогалтен да тудын кандидатуржым Марий Эл правительстве председательын икымше алмаштышыжлан темлыме дене келшен.

М.ИВАНОВА

 

 

Опубликовать в Одноклассники

Добавить комментарий