13 октябрьыште Йошкар-Олаште Свердловск областьысе Урал калык сымыктыш рӱдерын Урал кугыжаныш академический руш калык хоржо мастарлыкым ончыкта.
«Берегите Россию» концерт программыже Кугу Отечественный сарыште сеҥымылан 80 ий теммылан пӧлеклалтын. Тудым Я.Эшпай лӱмеш Марий кугыжаныш филармонийыште ончыктат.
Ты коллектив 9-16 октябрьыште Российын икмыняр олашкыже Россий культур министерствын гастроль-концерт планже почеш «Мы – Россия» федерал программе дене лектын коштеш.
Россий культур министр Ольга Любимова тыгерак палемден: «Гастроль-концерт план элыштына илыше-влакым национальный коллектив ден театр-влак дене палдараш ышталтын. Участник-влак кажне ийын ешаралтыт, садлан усталык шӱлышан ешна кугемеш. Тыге мемнан ойыртемалтше тӱвыра ден йӱлана, музыкальный ден театральный школ-влак аралалт кодыт да Россий мучко йолташым муыт».
Россий культур министерствын проектшым илышыш шыҥдараш «Росконцерт» ФГБУК полша.
Алевтина БАЙКОВА
Фотом Свердловск областьысе Урал калык сымыктыш
рӱдерын пресс-службыжо колтен
