КУЛЬТУР ДА ИСКУССТВО СЫМЫКТЫШ ТЕАТР

«Анна Каренина» – Йошкар-Олаште

25 майыште Э.Сапаев лӱмеш опер да балет академический театрыште зал тич чумыргышо калык Беларусь Республикын Кугу театржын артистше-влакым шокшын вашлийын.

Ты коллектив «Большие гастроли» программе дене  Российысе олалашке лекме туржым Марий Элыште «Анна Каренина» спектакль дене почын.

– Идалык ончыч ме Беларусь театр дене икте-весе дене кылым кучаш тӱҥалме меморандумыш кидпалым пыштенна. Тиде театрын артистше-влак ӱмаште шыжым Андрей Эшпай лӱмеш опер искусство фестиваль жапыште мастарлыкым ончыктен. А ты гана балет труппым ужаш моткоч куанле, – палемден  спектакль тӱҥалме деч ончыч опер да балет театрын художественный вуйлатышыже, тӱвыра, савыктыш да калык-влакын пашашт шотышто министр Константин Иванов.

– Мемнан театрын репертуарыштыже руш классике ик эн кугу верым айла. «Анна Каренина» – куштымаш-влаклан поян чапле постановко, – каласыш Беларусь театрын художественный вуйлатышыже, СССР-ын калык артистше Валентин Елизарьев. – Театрланна таче, 25 майыште – 90 ий. Тиде жапыште репертуарна сайынак пойдаралтын. Мемнан театрын сценыже тысе деч ныл пачаш кугурак.

Постановкым Беларусь театрын хореографше Ольга Костель шынден.

– Ме ойыртемалтше  балетым калык ончыко лукташ шоненна, Ольга тидлан Чайковскийын музыкшым ойырен налын, композиторын тӱрлӧ сочиненийжым кучылтмо. Шке жапыштыже Ольга мемнан театрын балериныже лийын, а вара Берлинысе консерваторийым хореограф-постановщик семын тунемын лектын. Лач тиде шинчымашыже чапле постановкым шочыкташ полшен, – рашемдыш хореограф-постановщикын полышкалышыже, Беларусь Республикын калык артистше, балетыште Алексей Каренинын партийжым куштышо Игорь Артамонов.

А.БАЙКОВА.

Авторын фотожо

Добавить комментарий