1 апрель гыч Марий Элыште Тазалык арня тӱҥалеш. Акций калыкым таза илыш-йӱлам кучаш кумылаҥдымашке виктаралтын. Тидын дене келшышын, республикыштына сотемдарыме мероприятий ден вашмутланымаш-шамыч эртат. А ме тендам Аноним алкоголик-влакын содружествышт дене палдарена.
Коммерческий огыл организацийлан шотлалтше содружестве калыклан алкоголизмым сеҥаш полша. Тудын йыжыҥъеҥже лияш ик йодмаш гына – йӱмым кудалташ кумыл. Содружестве шке кумылын, кӧ улмым рашемдыде да яра полша.
Аноним алкоголик-влакын содружествышт калыкын шке кумылын пуымо оксаж дене гына пашам ышта. Средства погынымаш-влакым эртараш арендоватлыме помещенийлан тӱлаш, методический литературым савыкташ кучылталтеш.
Йошкар-Олаште аноним алкоголик-влакын «Маяк» манме икымше группышт 1999 ийыште шочын. Тачысе кечылан олаште ныл тӱшка пашам ышта. Тыгаяк группо-шамыч Оршанке ден Советский посёлкылаште улыт. Тений мартыште Волжскышто ола администрацийын да рӱдӧ больницын тӱҥ врачшын полшымышт дене аноним алкоголик-влакын у группышт почылтын. Тыгай тӱшка-шамычын 24 ий пашам ыштыме жапыштышт хронический алкоголизм дене орланыше шӱдӧ дене еҥ таза да айык илыш корныш пеҥгыдын шогалын.
Аноним алкоголик-влакын чыла тӱшкашт тушко ушнышо кажне еҥлан программысе 12 ошкыл дене алкоголизм деч утлаш полша. Тыгодым эше медицине, социальный да моло тӧнеж, тӱшка увер йӧн, илем администраций, депутат да мер организаций-влак дене кылым куча.
Кызыт Марий Элыште аноним алкоголик-влакын нине тӱшкашт пашам ышта:
«Маяк» группо
Адрес: Йошкар-Ола, Палантай урем, 114-ше Б пӧрт, «Гостиный двор» сатулымо рӱдер, цоколь пачаш (кудывече гыч пурыман).
Погынымашым кажне кечын эртарат:
Шч-Кг 18:00 гыч 20:00 шагат марте, Шм-Рш 17:00 гыч 19:00 шагат йотке.
«Альтернатива» группо
Адрес: Йошкар-Ола, Волков урем, 60-шо пӧрт, 227-ше каб. (2-шо пачаш).
Погынымашым кажне кечын эртарат:
Шч-Кг 18:00 гыч 20:00 шагат марте, Шм-Рш 17:00 гыч 19:00 шагат йотке.
«Луч» группо
Адрес: Йошкар-Ола,Петров урем, 1-ше пӧрт («Бабочка» манме пӧрт, кудывече гыч «Аноним алкоголик-влак» манын возыман омсашке пурыман).
Погынымашым кажне кечын эртарат:
Шч-Рш 20:00 гыч 21:00 шагат марте.
«Есть Решение» группо
Адрес: Йошкар-Ола, Свердлов урем, 49-ше Б пӧрт (цоколь пачаш, 1-ше каб.)
Погынымашым кажне кечын эртарат:
Шч — Кг 12:00 гыч 13:00 да 19:00гыч 20:00 шагат марте; Шм-Рш 19:00 гыч 20:00 шагат йотке.
«ШАНС» группо
Адрес: Волжск ола, Грибоедов урем, 2-шо пӧрт (тӱҥ пӧртӧнчыл деч шола омса).
Погынымашым вӱргече еда 18 гыч 20 шагат марте эртарат.
«Возрождение» группо
Адрес: Советский посёлко, Эрык урем,6-шо пӧрт, 10-шо каб. (ончычсо 1-ше №-ан школ).
Погынымашым кушкыжмо да кугарня еда 18 гыч 19 шагат марте эртарат.
«Луч Надежды» группо
Адрес: Оршанке посёлко, Пролетарский урем, 8-ше пӧрт, 11-ше каб.
Погынымашым кушкыжмо да изарня еда 18 гыч 19 шагат марте да шуматкече еда 17 гыч 18 шагат марте эртарат.
«Шокшо линийын» телефонжо: +7 (902) 670-91-31 или 90-91-31. Сайт: www.aamariel.ru, www.aarussia.ru
М.ИВАНОВА ямдылен
