Линда Николаева Морко район Эҥерӱмбал ялыште шочын. 14 ияш улмыж годым аважын шочмо ялышкыже, Шернур район Чисолашке, илаш куснен.
Кызыт шке ешыж дене Волжский районысо Приволжский посёлкышто ила. Ныл ияш ӱдырыштын лӱмжӧ – Элави, руш семынже – Элавия. Посёлкысо 2-шо номеран садикыш коштеш. Линда тиде йочасадыште музыкым наҥгая, а такше шкешотан фотограф да видеограф семын палыме. Ава ден изи ӱдырым верысе библиотекыште чӱчкыдын ужаш лиеш. Линда каласкала:
– Кукнур школышко тунемаш толмекем, шукын ойлат ыле: «Библиотекыште ик книгат уке чай, кудыжым тыйын ават лудын огыл». Лудмо шумо кумылем ава дечын логалын.
Мый книгам лудаш, чынжымак, пеш йӧратем да шке ӱдыремат тыгак туныктем. Шкеже кажне кечын книгам кидышкем кучем, малаш вочмо деч ончыч Элавилан ачаже але мый лудына. Тудын шкенжын изирак библиотекыже уло.
Книгам шкаланемат, йочаланат шукыж годым Озонышто налам. Шуко погына, да у книга-влаклан вер лийже манын ойыркалем. Южо книгажым ужалем. Молан манаш гын, книга кызыт шерге, а вес еҥын кид гыч налаш шулдырак. Ик у книга ак дене 2-3 книгам налаш лиеш.
Ужалаш мый тыгай шонымаш дене луктам. Ала иктаж-кӧ лач тиде книгам лач кызыт лудаш налаш шона, а мыйын тудо ямде. Кудо книгаже чоныштем палым кода, тудым ом тӱкӧ, кодем.
Верысе книгагудыш намиен пуэнна. Мыняржым шотлен огынал, но иктаж 3 але 4 гана пӧлекленам чай. Тиде гана ӱдыремлан ойлышым:
– Мыйын библиотекыш пуаш йӧршӧ кок книгам уло, таче тудым наҥгаем. Тый мый денем миет?
– Мием, – мане.
– Ала тыят иктаж книгатым пӧлеклынет? – йодым.
Шке пӧлемышкыже куржо да кум книгам нумал кондыш. Руш поэт-влакын йоча почеламут сборникыштым, кӱлеш лиеш манын, кодышым. А тиде кок книгажым наҥгайышна.
Молан нине книгам манын йодым. Элави умылтарыш:
– Муми тролль-влак нерген мыйын эше ик книгам уло. А Мери Поппинсым ме лудынна, эше ик гана лудмо ок шу.
Мый тудын мутшо дене кӧнышым.
Книгагудыш ӱдыремым эре пырля ӱжам. Кызыт тудын книга дек интересше уло, да шкаланже келшышым шке ойырен налеш. Мый ом чаре.
Кажне кечын у книгам налын шукташ ок лий. Библиотеке тиде шотышто пеш сай. Книга шуко, лудаш веле кумыл лийже.
«А марий книгам лудыда?» йодышлан Линда вашештыш:
– Лудына. Ӱдырем «Ший пӱан ший Пампалчым» пеш йӧрата. Моло йомакшым мый каласкалем. Марла мутланаш тунемына эркын, ындыже умыла, почешем ойла.
Лидия СЕМЕНОВА мутланен
