Марий Элын 225 самырык еҥже «Профессионалитет» федеральный проектын икымше студентше-влакын радамышкышт ушнен.
Ты кечын Юл кундем кугыжаныш технологий университетын Йошкар-Оласе аграрный колледжше пелен ялозанлык направлений дене «Агротехник» тунемме-призводство кластерым торжественно почмо.
Ушештарена, кыдалаш образованийым пуышыо ты организаций палемдыме проектын конкурс отборыштыжо сеҥышыш лектын да 100 миллион теҥге грант дене палемдалтын. Тиде окса гыч 85 миллионжым тачысе жаплан келшыше ик эн у ялозанлык техникым налаш кучылтын, тудын дене студент-влак практике заятийлаште пайдаланаш тунемаш тӱҥалыт. Тыге, мутлан, нунылан «Цифран мланде паша» проект кышкарыште беспилотник але кызытсе комбайн дене пашам ыштен ончаш йӧн лиеш.
Кластерым почмаш Россий Федерацийын кугыжаныш флагшым нӧлтымӧ да элнан гимнжым мурымо гыч тӱҥалын. Тунемме-производство рӱдерыш пурышо кажне тунемме организаций (Йошкар-Оласе аграрный, Оршанкысе И.К.Глушков лӱмеш колледжла, тыгак Автодорожный, Марий радиомеханический да Транспортно-энергетический техникумла) гыч икымше курсыш толшо-влак товатмутым пуэныт. Туштыжо тыге ойлалтеш: «Илаш, тунемаш да Отечествым тӱзаташ пашам ышташ, «Профессионалитетын» студентшын лӱмжым кугешнен нумалаш, ончыкыжым профессионал моштымашым Марий Эл Республикын ялозанлыкшым вияҥдымаште кучылташ»
Икымше курсын студентше-влаклан поро тыланымашым Марий Эл правительстве председательын икымше алмаштышыже Евгений Кузьмин, республикын образований да науко министрже Лариса Ревуцкая, Юл кундем кугыжаныш технологий университетын ректоржо Игорь Петухов, Йошкар-Оласе аграрный колледжын директоржо Геннадий Богданов ойленыт. Нуно палемденыт: регионыштына тыгай тунемме-производство рӱдерым почмаш – ончыко эше ик ошкыл.
Г.Кожевникова
Фотом Марий Эл Образований да науко министерстве гыч налме
