Марий кугыжаныш университетын Аграрно-технологический институтыштыжо «Агроноватор-влак» фестиваль лийын.
Республик кӱкшытыштӧ икымше гана эртаралтше мероприятийын тӱҥ шонымашыже – школышто тунемше-влакым ялозанлык отрасльыште да агроэкологий областьыште шымлыме, проектым ямдылыме, опытым ыштыме пашалан кумылаҥдаш, тыгак агропромышленный комплексын профессийже-влак дене палдараш.
Фестиваль 5-11-ше класслаш коштшо 70 ӱдыр-рвезе иквереш чумырен. Участник-влак коклаште тыгак республикысе 20 агроклассын да ныл юннат клубын вуйлатышышт лийыныт. Нунылан «Агрономий», «Агроинженерий», «Агротехнологий» направленийла дене мастер-класслам ончыктеныт, тунемме-шымлыме паша дене семинарым эртареныт, ялозанлык напрвлений дене кылдалтше доклад-влакым ыштеныт.
Г.Кожевникова
Фотом Марий Эл Образований да науко министерствын соцкылысе лаштыкше гыч налме
