Марий Элыште 26 километр кужыт федеральный корным тӧрлатеныт.
Тиде пашам А-295 Йошкар-Ола – Зеленодольск кугорнын Волжский район гоч эртыше кумдыкыштыжо шотыш конденыт. Дорожник-шамыч тушто тоштемше асфальт шартышым кораҥденыт да олмешыже климатын могай улмыжым, мыняр транспорт кудалыштмым, а ты участкыште кажне кечын 22 тӱжем наре автомобиль эрта, шотыш налын, уым пыштеныт. Тыгак Яльчик, Памар да Кӱсола илемла воктенысе автобус чарналтышлаште ӱмбал шартышым уэмденыт. Тиде кумдыкыштак бордюр кӱм ачаленыт, термопластик дене разметкым ыштеныт.
Р-177 «Поветлужье» федеральный автомобиль корнышто 186-шо гыч 195-ше километр марте кумдыкышто тыгай сынан пашамак шуктеныт. Тиде участке республикын Юрино районыштыжо – Вӱтла эҥер гоч шуйналтше кӱвар гыч тӱҥалын Нижегородский область чек марте – верланен. Тушто пеҥгыде да йӱштым чытыше 4 см кӱжгытан асфальтобетонн шартышым пыштеныт. Тиддеч посна корно тӱрыш тыгыде кӱм оптеныт, разметкым ыштеныт да Копорулихӓ ял воктене кок чарналтыш площадкым ачаленыт.
Федеральный автомобиль корнын Марий Элысе участкылаштыже паша умбакыже шуйна. Корным чоҥымо сезон мучашлалтмешке Р-176 «Вятка» кугорнышто 40 километр кужытым шотыш конден шуктышаш улыт.
Л.Камалетдинова
