ПГТУ-н Йошкар-Оласе аграрный колледжыштыже Россий историй да руш тӱвыра дене республик кӱкшытан семинар эртен.
Тудо кундемыштына шинчымашым погышо йот студент-влакым иквереш ушен. Нунылан поро мутым Йошкар-Олаште Россий МИД-ын представительже Лариса Полушина, Республикысе руш тӱвыра рӱдерын директоржо Наталья Наумова ойленыт.
Тидын деч вара погынышо-влаклан шочмо эл верч вуйым пыштыше Совет Ушемын Геройжо-влак, тушман ваштареш кредалаш литератур ден искусствын полшымышт нерген каласкаленыт.
Ты кечын йот студент-влак кумдан палыме «Катюша» мурым муреныт, «Журавли» почеламутым лудыныт. Тидын деч вара нунылан акцентологический диктант (палемдыме мут-влакым чын каласен текстым лудмаш) лийын. А мучашлан чыланат Э.Сапаев лӱмеш Марий кугыжаныш опер да балет театрыште «Петр I» оперым онченыт.
Г.Кожевникова
Фотом Йошкар-Оласе аграрный колледжын соцкылысе лаштыкше гыч налме
