ШИНЧЫМАШ КУГОРНЫШТО

А ончылно – «Орлёнок» йоча рӱдер!

   Тиде кечылаште ме Кужэҥер район  Йӱледӱр кыдалаш школышто лийынна. Таче тыште чылаже 149 тунемше шинчымашым пога. Тунемме верын илышыж дене мемнам вуйлатыше Евгений Петров палдарыш.

Пытартыш жапысе эн кугу событийже – тений майыште тысе школышто тунемше икмыняр йоча Российысе «Орлёнок» йоча рӱдерын ик сменышкыже кая. Нине ӱдыр-рвезе-влак Школышто тунемше-влакын российысе толкынышкыжо ушненыт, «Орлята» программыште шкем ончыктеныт да сеҥышыш лектыныт!

– Мемнан школ Школышто тунемше-влакын российысе толкынышкыжо  пеш сайын пашам ышта,  – ойла тӱҥалтыш класслам туныктышо, школышто 33 ий тыршыше Лилия Валентиновна Яковлева. – Вожатыйна Эльвира Мамаева мыланна  «Орлята»  Россий программыш ушнаш темлен. Ме каҥашенна, ача-ава-влак дене мутланенна да ик ойыш шуынна. Программе почеш, кажне тылзын могай-гынат теме дене пашам ыштыман. Икымшыже «Орлёнок-лидер» маналтын. Нылымше классыштына тыгайже – Дарина Поликарпова, пеш тале. Вес темыже «Орлёнок – эрудит» маналтын да уш-акылым вияҥдаш виктаралтын: ме тӱрлӧ кроссвордым решатленна, шанчызе-влак дене палыме лийынна.  Вара «Орлёнок-мастер», «Орлёнок-доброволец» теме-влак почеш тыршенна: икымше-кокымшо класслаште тунемше-шамычлан кидпашам ышташ полшенна, илалше-влаклан полышым пуэнна. Кажне тылзе деч вара отчетым Российысе «Орлёнок» йоча рӱдерыш колтенна, а иктешлыше проектым вияш эфирыште, телемост дене ончыктенна. Каласыман, темыжым ончылгоч пален огынал, эфир годым гына каласеныт. Мыланна «Сеҥымаш дене кылдалтше тасма» теме логалын. Ик шагат жапыште йоча-влак моштымашыштым ончыктеныт. Нуно школым тунем пытарыше-влак тасма дене кылдалтше проектым ыштеныт. Тунемшына-шамычын шонымашышт, пашашт жюрилан  келшен. Россий мучко тиде конкурсыш 767 класс ушнен, а сеҥышыш  46 веле, Марий Эл гыч – мемнан Йӱледӱр школна лектын.  Ынде йоча-влак чемоданым погат: «Орлёнокышто» смене 12 гыч 25 май марте эрта. Индешымше майыште корныш тарванена.

Ты кечын ме школысо тоштерыште, книгагудышто, мастерскойлаште, физкультур урокышто лийна. Тунемме верыште илыш «шолеш», а тыгай кугу сеҥымаш деч вара – эшеат.

М.СКОБЕЛЕВ

Авторын фотожо

Опубликовать в Одноклассники

Добавить комментарий