27-30 августышто Йошкар-Олаште «И КРАТКАЯ» III кинофестиваль эрташ тӱҥалеш.
Икымше кечын 17 шагатлан кумдан палыме еҥ-влак «йошкар корно» дене эртат. 18 шагатлан Яков Эшпай лӱмеш Марий кугыжаныш филармонийыште мероприятийым торжественно почыт.
Режиссер Андрей Эшпай кинофестивальын почётан унаже лиеш. Икымше кинофестивальыште тудо жюрим вуйлатен, мероприятийым почын, наградым кучыктен да ончышо-влак дене усталык вашлиймашым эртарен. Кокымшо фестивальыште режиссёр регионын тӱвыражым вияҥдымашке надырым пыштымыжлан Марий Эл Тӱвыра, печать да калык-влакын пашашт шотышто министерствын оҥеш пижыктыме знакше дене палемдалтын.
«И КРАТКАЯ» III фестиваль кышкарыште уна-влакым Андрей Андреевич дене усталык вашлиймаш вуча. Ончышо-влак кинорежиссёрын усталыкше дене лишкырак палыме лийын да йодышым пуэн кертыт.
«И КРАТКАЯ» кинофестиваль Тӱвыра инициативе президент фондын, Марий Эл правительствын да Регионысо кинематографлан полшышо фондын эҥертышышт дене эртаралтеш.
