Марий Эл «Калык кугешнымаш-2026» конкурсыш кандаш проектым пуаш ямде.
Тымарте республикнан кум йодмашыжым официально регистрироватлыме, тыгеже конкурсын чыла номинацийышкыже чумыржо кандаш проектым колташ палемдыме. Тидын нерген таче Кугыжаныш Погын председательын икымше алмаштышыже, Российысе калык-влак ассамблейын регионысо пӧлкажым вуйлатыше Лариса Яковлева Российысе калык-влак ассамблейын совещанийыштыже видео-конференц-кыл форматыште увертарен.
Совещаний «Калык кугешнымаш-2026» Всероссийский мер премийын регион-влак кокласе йыжыҥжым, тыгак Россий Федерацийысе субъект-влакын йодмашым пуымо чолгалыкыштым иктешлыме дене кылдалтын.
Федеральный округ-влакын еҥышт мыняр йодмашым налаш шонымышт да верлаште конкурсым организоватлыме шырым дене палдареныт. Тыгак регион-влакын участник-шамычым сайынрак саламлыме, лауреат-влаклан призан фондым кумдаҥдыме шотышто темлымашлаштым каҥашеныт. Ассамблейын сайтыштыже пайдале опыт дене уло элым палдараш эн сай этнокультур практик-влакын алманахыштым ыштыме йодышлан посна тӱткышым ойыреныт.
Тений конкурс шымше гана эртаралтеш.
– «Калык кугешнымаш» премий – награде гына огыл, тыгак калыклан кӱлешан пашалан ак. Конкурс мемнан проектнам чумыр эллан ончыкташ, ик семын шонышо-влакым муаш, умбакыже вияҥаш полышым налаш йӧным ышта. Ме ужына, премийым налаш шонышо-влак ий еда ешаралтыт, да тиде кажне регионышто шуко калыкан элнан икойлыкшо да эсенлыкше верч азапланыше еҥ-шамычын улмышт нерген ойла, – палемден Лариса Яковлева.
Конкурс шым номинаций: «Российысе калык-влакын икойлыкыштлан служитлымаш», «Российысе калык-влакын шочмо йылмышт», «Российысе калык-влакын тӱвырашт», «Шуко калыкан Россий – медиаште», «Эн сай этнопрактике», «Виян Лидер», «Ушан тукым» – дене эрта. Тений, Российысе калык-влакын икоян улмо идалыкыште, «Икойлыкын куатше» специальный номинацийым учредитлыме.
Марий Элын «Калык кугешнымаш» конкурсышто участвоватлыме сай опытшо уло. 2021 ийыште лингвист Андрей Чемышев «Шочмо йылме-влакым арален кодымашке да вияҥдымашке надырлан» номинацийыште лауреат лийын. 2025 ийыште директор Ирина Фоминыхын вуйлатымыж почеш «МЭТР» телекомпаний «Кугыжаныш национальный политике дене палдарымашке надырлан» номинацийыште II степенян лауреат лӱмым сеҥен налын.
Тений республикна кандаш йодмашым пуаш палемден, тышечын кумытшым официально регистрироватлыме.
«Ушан тукым» номинацийыш Юл кундем кугыжаныш технологий университет гыч Стратегический коммуникацийым вияҥдыме рӱдерын начальникше, «TechNews» увер проектын кураторжо Ольга Каменских ден проектын да «Медиапорт» студент рӱдерын вуйлатышыже Надежда Кубаревам темлыме. Нунын «TechNews» медиапроектышт шкенан элысе науко ден технологийым чапландарымашке, самырык тукымым Российын да Марий Элын шанче-технологий поянлыкышт дене кугешнаш таратымашке виктаралтын.
«Виян Лидер» номинацийыш кок претендентым: Марий кугыжаныш университетын ректоржо, Кугыжаныш Погынын бюджет да экономический политике шотышто комитетшын председательже Михаил Швецов ден республикысе Калык усталык да тӱвыра ден каныме паша шотышто шанче-методике рӱдерын калык культур пӧлкажым вуйлатыше Максим Алкайкиным – темлыме.
Конкурсын регион-влак кокласе йыжыҥышкыже йодмашым гордость-нации.рф официальный сайтыште 1 сентябрь марте налыт.
– Йодмашым пуымо жапым шуйкалаш огеш кӱл. А этнокультур да мер проект-влак дене пашам ыштыше-шамыч шкеныштым эше федеральный кӱкшытыштӧ ончыктен кертыт, – палемден марий парламентын икымше вице-спикерже.
Маргарита ИВАНОВА.
Марий Эл Кугыжаныш Погынын пресс-службыжын фотожо.
