Шернур округысо рӱдӧ больницыште «Ялысе врач» программе дене анестезиолог-реаниматолог пашам ышташ тӱҥалын.
– Эмлымверлан тыгай профилян специалист моткочак кӱлын, да тиде должностьыш Йошкар-Ола гыч опытан врач Александр Васильевич Соловьев толын. Ме тудлан у пӧртыштӧ кок пӧлеман пачерым ойыренна да больницыштына анестезиологический службо, ойпидыш дене келшышын, эн шагалже вич ийлан сай специалист дене пойдаралтын манын ӱшанена, – палемда Шернур эмлымверын тӱҥ врачше Алексей Новоселов.
Александр Васильевич шочынжо Морко район Изи Корамас ял гыч. Кугезе кочаже – Совет Ушем Герой Василий Иванович Соловьев.
Доктор марла пеш яндарын да шыман мутлана, поснак тора ялла гыч эмлалташ толшо илалше еҥ-влаклан можым-кузежым шочмо йылме дене радамын умылтара, да нуныжо тудлан нимучашдымын тауштат.
Александр Соловьев ойырен налме пашаштыже 14 ий тырша. Эмлыме паша да педиатрий, анестезиологий да реанимаций специализацийла дене Самарысе да Казаньысе кугыжаныш медицине университетлаште тунемын. Квалификацийым Кировысо гематологий ден вӱрым налме пашам, Ивановысо ава улмым да йоча пагытым научнын шымлыше институтлаште, Москвасе Медицине пашаеҥ-влакым туныктымо рӱдерыште, Казаньысе кугыжаныш медицине университетыште нӧлтен. Таче тудо – врач-анестезиолог-реаниматолог, врач-трансфузиолог, здравоохраненийыште организатор.
Паша корныш Самара олаште тунеммыж годымак шогалын – Йоча областной больницын психоневрологический отделенийыштыже медбратлан ыштен. Вара шочмо кундемыш пӧртылын, Медведево больницыште анестезиолог-реаниматологлан, Оршанке больницыште тӱҥ врачын медицине ужаш шотышто алмаштышыжлан ыштен. Шернур больницыш Марий Элын Перинатальный рӱдерже гыч куснен.
– Мыйым тышке ойырен налме специальность дене кумданрак пайдаланаш, ала-мом ум ужаш да пален налаш, шукырак еҥлан полшаш шонымо кумыл конден. Шкат паледа, Перинатальный рӱдерыште ӱдырамаш-влак дене гына пашам ыштыман. Шернур больницыште профиль палынак кумда, тыште поснак хирургический да вӱргороно отделенийлаште паша сита, реанимацийыштат тыршаш кӱлеш. Черле-влак тӱрлӧ профилян улыт, сандене тымарте погымо шинчымашым пайдалын кучылташ, опытым погаш йӧн моткоч кугу, – палемдыш «ялысе» доктор.
Александр Соловьевын пелашыжат медик, кызыт тудо ешын у пыжашыштыже изи ӱдырыштым онча.
Тений «Кужу да чолга илыш» национальный проектым илышыш пуртымо кышкарыште «ялысе» программе-влак дене Медведево районысо Руэм врачебный амбулаторийыште участкысе терапевт Олеся Кузнецова ден Курыкмарий районысо Картук фельдшер-акушер пунктышто фельдшер Анна Когаринова пашам ышташ тӱҥалыныт.
Ойпидышым эше кок доктор ыштен да лишыл жапыште республикнан ялысе специалистше-влак радамыш ушна. Рашемденрак палемдаш гын, иктыже Медведево районысо рӱдӧ больницыш стоматологлан толеш, весыже – Оршанке районысо больницыш участкысе педиатрлан.
Тений «Ялысе доктор» программе дене эше неврологым, участкысе терапевт ден хирург-влакым, гинекологым, инфекционистым, кардиологым, ЛОР-врачым, психиатрым, офтальмологым пашаш налаш палемдыме. «Ялысе фельдшер» программе дене Звенигово, Марий Турек, Медведево районласе, Килемар, Шернур округласе фельдшер-акушер пунктлаште вуйлатыше-шамычым вучат. А чылаже 18 врач ден 7 кокла специалистым налаш шонат.
Маргарита ИВАНОВА.
Александр Соловьевын еш альбомжо гыч фото.
