Марий Элым вуйлатыше Юрий Зайцев Шоя-Кузнецово интернат-пӧртыштӧ пищеблокым олмыктымо пашам терген.
Тиде паша Россий Федерацийын «Граждан-влаклан социальный полыш» кугыжаныш программе почеш ышталтын да интернат-пӧртыштӧ илыме условийым саемдаш виктаралтын. Проектым илышыш пурташ 127 миллион теҥге ойыралтын.
Регионым вуйлатыше уэмдыме объектыште кочмо залым, «шокшо» да кондитер цехлам, пакчасаскам аралыме верым ончен лектын. «Олмыктымо пашан тӱҥ шонымашыже – интернатыште улшо-влаклан сайын илаш йӧным ышташ. Проектым Россий Федерацийысе Федеральный Собранийын Федераций Советшын полшымыж дене илышыш пуртымо, сандене Валентина Ивановна Матвиенколан тауштем. Пашанам «Единый Россий» партий сайлан шотлен, тыге пырля ме республикысе калыклан кӱлешан лектышыш шуынна», – каласен Юрий Зайцев.
Уэмден олмыктымо пашалан кӧра пищеблок кумдаҥын: ондак кочмо залыште 45 вер гына лийын, да ныл смене дене кочкаш логалын гын, ынде 100 еҥлан иканаште вераҥаш йӧн ышталтын.
Олмыктымо дене пырля тыште республикын бюджетше гыч ойырымо 21 миллион теҥге полшымо дене оралтыште вӱдпуч системым да электросетьым шотыш кондымо.
Шоя-Кузнецово интернат-пӧрт 1936 ий гыч пашам ышта, кызыт тушто 301 вер уло. Илалше да инвалид радамыште улшо-влаклан почмо социальный тӧнежыште таче 297 еҥ ила.
Марий Элым вуйлатышын пресс-службыжын уверже негызеш Галина Кожевникова ямдылен.
Фотом Марий Элым вуйлатышын пресс-службыж гыч налме.
