Калык-влак коклаште келшымаш кылым пеҥгыдемдымаште мер организаций-влак надырышт поснак кугу.
Тыгай шонымашым пеҥгыдемден каласышт эртыше вӱргечын Марий Элын Тӱвыра, савыктыш да калык-влакын пашашт шотышто министерствыже пеленысе Калык-влакын пашашт шотышто каҥашын кумдаҥдыме заседанийыштыже.
Марий Эл правительстве председательын алмаштышыже – тӱвыра, савыктыш да калык-влак паша шотышто министр, Каҥашым вуйлатыше Константин Иванов республикыштына улшо мер организаций-влакын сомылыштым сайлан шотлен аклыш: кеч марий, кеч финн-угор але моло калык дене кылдалтше мероприятийлам эртарымаште меръеҥ-шамыч кугу эҥертыш улыт.
Заседанийыште Каҥашын еҥже-влак дене пырля ик ӱстел йыр «Российысе калык-влак ассамблей» общероссийский мер да кугыжаныш организацийын Марий Элысе региональный пӧлкажын вуйверыштыже улшо-влак лийыныт. Лач ты пӧлкан шуктен шогымо да ончыкылаш паша планже нерген Ассамблейын регионысо пӧлкажын председательже Лариса Яковлева каласкалыш.
Нунын радамыште 21 тӱрлӧ калыкын еҥже-влак улыт, чыланат – Российын гражданинже. Марий Элыште тӱрлӧ мероприятийыш, поро кумылым ончыктышо концертлашке чолган ушнат, марий тӱвыра да йӱла дене палыме лийыт. Ӱмаште Шочмо элым аралышын идалыкшылан пӧлеклалтше кугу конференцийым эртареныт. «Калыкын кугешнымашыже» российысе мер премийлан кандидатурым каҥашен темлыме пашамат шукташ кӱлын. Ушештарена, Юл кундем федеральный округышто Марий Эл гыч ӱмаште кум номинацийыште сеҥышыш лектыныт.
Российысе калык-влакын икоян улмо идалыкыште палемдыме мероприятий-влак кокла гыч ик эн кугужо августышто Россий флагын кечыжым палемдыме кышкарыште эртышаш. Тунам Ассамблей лӱм дене тӱрлӧ калык-влакын самырык тукымыштым кокымшо патриотический слётыш чумырат.
Мер Каҥаш вуйлатыше Эдуард Александров кеҥежым Марий самырык тукымын всероссийский слетшым эртарымашке Ассамблейын еҥже-влакымат ушнаш, лектор семынат пашам ышташ ӱжын. Константин Анатольевич тений слётым Йошкар-Олаште, И.С.Палантай лӱмеш тӱвыра да сымыктыш колледжын калыкле сымыктыш гимназийыштыже, эртараш темлен.
Заседанийыште тыгак Марий Элыште Россий Федерацийын 2036 ий марте Кугыжаныш национальный политике стратегийжым шыҥдарыме шотышто мероприятий-влак план да республикын Кугыжаныш национальный политике концепцийжын проектше нерген докладым колыштмо. Тудым Марий Элын тӱвыра, савыктыш да калык-влакын пашашт шотышто министрын алмаштышыже Михаил Матвеев ыштен.
Каҥаш председатель Константин Иванов министерстве пеленысе Каҥашыш кок у еҥым, АФУН-ын самырык-влак пӧлкажым вуйлатыше Максим Алгайкин ден республикысе Татар-влакын калыкле-тӱвыра автономийыштым вуйлатыше Рустам Даминовым, пуртымо нерген увертарыш.
Светлана Пехметова
Марий Элын Тӱвыра, савыктыш да калык-влак паша шотышто министерствын пресс-службыжын фотожо.
