Кукнур кече
Сеҥен кайышыже – шукырак
Идалыклан ик гана сентябрь тылзыште Шернур район Кукнур кечым палемдыме йӱла 28 ий ончыч тӱҥалтышым налын. Тылеч вара тудо ик ганат эртаралтде кодын огыл.
Эсогыл ӱмаште, пандемий пагытын пеҥгыде режим жапыштыже, Кукнур волостьын кубокшо верч мини-турнирым, эртарен колтеныт. Такше ий гыч ийыш ты пайрем эреак уэмдалт толеш. Тений, 12 сентябрьыште, тудо утларакше спорт пайрем семын лие. Но эртарыме чумыр радамже ыш пудырталт. Участник-влакын парадыштышт мини-футбол да ӱдырамаш баскетбол турнирлаш ушнышо-влак, кундемын ветеранже ден шочмо вер-шӧрым чапландарымашке вийыштым пыштыше земляк-шамыч лийыныт. Вӱдышӧ В.Мочаев икмыняр датым палемден кодыш: Кукнурысо Крестовоздвиженский черкылан – 205 ий, Шернур районлан – 100 ий, Кукнур тӱвыра да каныме полатлан – 25 ий.
Кукнур кечын ик эн рӱдыжлан, чылаштым ушышо, кугешнаш таратыше татлан тисте-влакым нӧлтымым шотлем. Тиде гана Российыным РФ культурын сулло пашаеҥже С.Белкова ден СССР-ын ече дене спорт мастерыш кандидат Ю.Ямбулатов, Марий Элыным ятыр ий верысе ялозанлыкым вуйлатыше Н.Ялтаев ден Кукнур школын тале спортсменкыже Ю.Четкарева да Шернур кундемыным «Кукнур» футбол командын капитанже А.Виноградов кум тӱрлӧ гимн почеш нӧлтеныт. А Шернур районынжо годым эреак Кукнур кундемын гимнже шергылтеш. Тудым школ стадионыш погынышо-влак кокла гыч шукынжо йӱкын пырля мурат.
Спорт пайрем дене район администрацийым вуйлатыше А.Кугергин, Кукнур ял шотан илем администрацийым вуйлатыше Л.Долгушев саламленыт. Александр Викторович школлан мече-влакым, а земляк-шамыч кокла гыч элкӧргӧ службын майоржо И.Тойшев «Рота, ушешдшая в века» книгам пӧлеклышт.
Футбол дене мини-турнирыш латик команде ушнен. Кудытшо – Шернур район гыч: «Нива» (Мустай), «Семол» (Кугэҥер), «Акпатыр» (Шернур), «Эрон» (Чылдемыр), «ДЮСШ» (Шернур) да «Кукнур». Киров область гыч тиде гана ик команде толын – «Безводное» (Пижанью). У Торъял ден Марий Турек районла гыч «Немда» ден «Арбор» ушненыт. Йошкар-Ола гыч «Звезда» командым Российын сулло туныктышыжо, тренер Е.Марков конден. Шкежат ты турнирым эртарыше оза-влаклан пӧлекым кучыктен. А теве Татарстан кундем гыч футболист-влак икымше гана толыныт – Балтаси районышто марий-влакын илыме Улисъял гыч «Улисъял» команде. Кубокым ты гана «Звезда» солалтыш, а кокымшыш «Акпатр», кумшыш «Эрон» лектыч.
Баскетболистке-влак кокла гыч эн виянже Марий Турек район гыч лийыныт.
Кирам нӧлтымӧ турнирыште латшым ий почела амалкалче Юрий Зонов спонсор ыле. Чаманен каласыман, ты гана таҥасымаш тудын деч посна, тудым шарныме лӱмеш, эртаралте. Юрий Александрович кеҥеж рӱдыштӧ ӱмыр лугыч лийын.
Туге гынат ешыже турнирым умбакыжат эртараш полшаш кумылаҥын. 16 килограмман кирам Кужэҥер район Тумньымучаш ял гыч Александр Иванов 157 гана нӧлталын да икымше верыш логалын. Кокымшыш Мустай гыч Алексей Чимаев (
81 гана), кумшыш Ямакай гыч Эдуард Киткаев (65 гана) лектыныт. Александр ешыж дене Йошкар-Олаште ила. Кок
эргыжат иймаш дене кылым кучат. Суртоза таза илыш-йӱла шотышто шкежак сай пример – аракамат огеш йӱ, тамакымат огеш шупш.
Ял шотан илем кумдыкыш пурышо ял-влак коклаште куштылго атлетике дене эстафетыште икымше верыш Аптулят гыч рвезе-влак лектыныт, кокымшыш – Аҥанур гыч, кумшыш – Чисола гыч.
Уремыште келыштарыме сценыште верысе тӱвыра да каныме пӧрт пеленысе коллектив ден Сергей Пакеевым ончаш ятырынак чумыргеныт ыле. А кастене ончычсо семынак Кукнур села ӱмбалсе кавам тулсавыш волгалтарен. Тений Кукнур кече историеш эше ик мероприятий дене шарнымашеш кодеш. Селасе рӱдӧ уремыште йоча площадкым почыныт.
С.Пехметова
Снимкылаште:
Верысе тӱвыра да каныме пӧртым вуйлатыше А.Конаков «Кукнур» командын самырык футболистше Максим Евсеевлан (Олимпийский резерв школын тунемшыже) пӧлекым кучыкта
Кирам нӧлтымаште сеҥыше Александр Иванов
Авторын фотожо
