«Оласе йырвелым йӧнаным ыштымаш» федеральный проект 2017 ий гыч шыҥдаралтеш. Ты жапыште Марий Элыште 486 кумдыкым тӱзатыме, тышеч – 297 кудывечым, калык тӱшкан коштмо 183 верым да 6 паркым. Тӱзатыме пашам шукташ 801,1 миллион теҥге ойыралтын, 715,2 миллион теҥге федеральный казна гыч пурен. Тений, 2021 ийыште, республикыштына 85 территорийым олмыкташ, тӱзаташ палемдыме, чыла паша 194,8 миллион теҥгешке шуеш, 178,0 миллион теҥге федерал бюджет гыч ойыралтеш. Нине цифр-влакым Марий Эл Республикын Чоҥымо паша, архитектур да илыме вер ден коммунал озанлык министерстве шке сайтыштыже ончыкта. Ты министерствак «2018 – 2024 ийлан Марий Эл Республикын территорийыштыже оласе йырвелым йӧнаным ыштымаш» кугыжаныш программын ответственный исполнительжылан шотлалтеш.
Ушештарена, шушаш 2022 ийыште Марий Элыште тӱзатышашлык 31 кумдык верч йӱклымаш 30 май марте шуйна.
Л.СЕМЕНОВА
